२९ मंसिर, काठमाडौं— चालु आर्थिक वर्षको कात्तिक महिनामा असोजको तुलनामा रेमिट्यान्स आप्रवाह घटेको छ। असोजको तुलनामा कात्तिकमा रेमिट्यान्स ६४ अर्ब रुपैयाँले कमी आएको हो।

नेपाल राष्ट्र बैंकका अनुसार २०८२ कात्तिक महिनामा १ खर्ब ३३ अर्ब ८२ करोड रुपैयाँ रेमिट्यान्स भित्रिएको छ। जबकि असोज महिनामा २ खर्ब १ अर्ब रुपैयाँ बराबरको रेमिट्यान्स नेपाल आएको थियो।

यद्यपि, चालु आर्थिक वर्ष २०८२/८३ को पहिलो चार महिनामा रेमिट्यान्स आप्रवाह ३१.४ प्रतिशतले वृद्धि भई ६ खर्ब ८७ अर्ब १३ करोड रुपैयाँ पुगेको छ। गत आर्थिक वर्षको सोही अवधिमा रेमिट्यान्स आप्रवाह ९.४ प्रतिशतले मात्र वृद्धि भएको थियो। गत आवको कात्तिक महिनामा रेमिट्यान्स १ खर्ब १४ अर्ब ३१ करोड रुपैयाँ रहेको थियो।

डलरमा हेर्दा चालु आवको चार महिनामा रेमिट्यान्स आप्रवाह २५.३ प्रतिशतले बढेर ४ अर्ब ८८ करोड अमेरिकी डलर पुगेको छ। गत आवको सोही अवधिमा यस्तो वृद्धि ८.२ प्रतिशत मात्र रहेको थियो।

राष्ट्र बैंकका अनुसार चालु आवको कात्तिकसम्म खुद द्वितीय आय ७ खर्ब ५४ अर्ब ९३ करोड रुपैयाँ पुगेको छ। गत आवको सोही अवधिमा यस्तो आय ५ खर्ब ६९ अर्ब २९ करोड रुपैयाँ थियो।

यसैबीच, चालु आवको कात्तिकसम्म वैदेशिक रोजगारीका लागि अन्तिम श्रम स्वीकृति लिने नेपालीको संख्या १ लाख ४५ हजार ९ सय ७३ पुगेको छ भने पुनः श्रम स्वीकृति लिनेको संख्या १ लाख २७ हजार ८ सय ३७ रहेको छ। गत आर्थिक वर्षको सोही अवधिमा यस्तो संख्या क्रमशः १ लाख ४७ हजार ४ सय ७८ र ९४ हजार १०५ थियो।