स्वास्थ्य मन्त्रालयको जाडो चेतावनी: आगो, हिटर र गिजर प्रयोगमा सावधानी अपनाउन आग्रह
काठमाडौं, ११ पुस । स्वास्थ्य तथा जनसंख्या मन्त्रालयले जाडोमा आगो ताप्दा, हिटर बाल्दा वा गिजर प्रयोग गर्दा पर्याप्त सावधानी अपनाउन सर्वसाधारणलाई आग्रह गरेको छ।
स्वास्थ्य मन्त्रालयअन्तर्गत राष्ट्रिय स्वास्थ्य शिक्षा, सूचना तथा सञ्चार केन्द्रले जारी गरेको सन्देशअनुसार, जाडोमा आगो, हिटर वा गिजरको असावधानीपूर्ण प्रयोगले अप्रिय घटनाहरू निम्त्याउन सक्ने भएकाले सावधानी अपनाउनुपर्ने बताइएको छ।
केन्द्रले आगो ताप्दा वा हिटर बाल्दा कागज, कपडा जस्ता छिटो जल्ने सामग्री नजिक नराख्न, प्रयोगपछि पूर्ण रूपमा निभाउन र हिटर वा गिजर समय समयमा बन्द गर्न सुझाव दिएको छ।
त्यसैगरी, गिजरको मुख्य मेसिन बाथरुम बाहिर खुला ठाउँमा जडान गर्न र लामो समयसम्म गिजर खोलेर बाथरुममा बस्न नहुने चेतावनी पनि दिइएको छ।
केन्द्रले कोइलाजन्य स्रोतबाट सकेसम्म आगो नताप्न र हावा ओहोरदोहोर हुने ठाउँमा मात्र हिटर वा गिजर प्रयोग गर्न आग्रह गरेको छ।
