काठमाडौँ– काठमाडौं महानगरपालिकाका मेयर बालेन्द्र शाह (बालेन)ले नयाँ राजनीतिक दल ‘देश विकास पार्टी’ दर्ता गर्ने तयारी तीव्र बनाएका छन्। राष्ट्रिय स्वतन्त्र पार्टी (रास्वपा)सँग भइरहेको छलफल सकारात्मक निष्कर्षमा नपुगेमा ललितपुरको ज्वागलमा निर्माणाधीन घरलाई नै पार्टी कार्यालय बनाइने तयारी गरिएको स्रोतले जनाएको छ।

ज्वागलस्थित उक्त घरको बाहिरी संरचना निर्माण अन्तिम चरणमा पुगेको छ भने भित्री कोठाहरूमा कार्यालय सेटअपको काम पनि सुरु भइसकेको छ। कार्यालय प्रयोजनका लागि कोठा व्यवस्थापन, फर्निचर जडान तथा अन्य आवश्यक संरचना मिलाउने काम भइरहेको बताइएको छ।

केही दिनयता मेयर शाह ज्वागलमै रहेका आफ्ना सहयोगी कुमार बेनको घरमा बसेर विभिन्न राजनीतिक भेटघाट र छलफलमा सक्रिय रहेका छन्। रास्वपासँग सहकार्यको सम्भावनाबारे निरन्तर संवाद भए पनि अन्तिम सहमति भने हुन नसकेको स्रोतको भनाइ छ।

स्रोतका अनुसार सहमति जुटे बालेन रास्वपासँगै अघि बढ्नेछन्। सहमति नभए ‘देश विकास पार्टी’लाई औपचारिक रूपमा दर्ता गर्दै ज्वागलस्थित यही भवनबाट पार्टी गतिविधि सञ्चालन गरिने तयारी छ।

मेयर बालेनको सम्भावित नयाँ राजनीतिक कदमलाई लिएर राजनीतिक वृत्तमा चासो बढ्दै गएको छ।