जनकपुरधाम। जनता समाजवादी पार्टी (जसपा) नेपालका मधेश प्रदेश संसदीय दलका नेता सरोजकुमार यादवले प्रदेश सभाका सभामुख रामचन्द्र मण्डलविरुद्ध दर्ता भएको अविश्वास प्रस्तावमा सात दिनभित्र प्रक्रिया अघि बढ्ने बताएका छन्।

बुधबार सञ्चारकर्मीहरुसँग कुरा गर्दै यादवले प्रस्तावको मतदानमा पार्टीको ह्वीप लाग्ने स्पष्ट पारे। उनले भने, “यसमा दलीय ह्विप किन लाग्दैन? जुनसुकै भोटिङमा पनि दलीय ह्विप लाग्छ।”

यादवका अनुसार अबको सात दिनभित्र उपसभामुखले सदन बोलाउने छन्। त्यसपछि प्रस्तावकले प्रस्ताव पेश गर्ने, समर्थकले समर्थन जनाउने र खुला छलफल हुने छ। सभामुखलाई आफ्नो बचाउ प्रस्तुत गर्न बोलाउने र त्यसपछि मात्र भोटिङ प्रक्रियामा जान प्रस्ताव प्रक्रिया तय गरिएको छ।

मतदानमा प्रस्तावको पक्षमा सदनको दुई तिहाई बहुमत आएमा सभामुख मण्डल तत्काल पदमुक्त हुने छन्। यादवले सभामुखलाई पनि प्रस्तावबारे जानकारी दिइएको र उनी उपस्थित हुने वा नहुने आफ्नो इच्छा अनुसार हुने बताए।

केही दिनअघि ७४ सांसदको हस्ताक्षरमा मण्डलविरुद्ध अविश्वास प्रस्ताव दर्ता भएको थियो।