काठमाडौं – आगामी फागुन २१ गते हुने प्रतिनिधिसभा सदस्य निर्वाचन र माघ ११ गते हुने राष्ट्रियसभा सदस्य निर्वाचनका लागि राजनीतिक दलहरूले निर्वाचन आयोगमा निवेदन दिने प्रक्रिया जारी छ। आयोगले स्वीकृत कार्यक्रमअनुसार यही मङ्सिर १ गतेदेखि सुरू भएको निवेदन दिने प्रक्रिया मङ्सिर १० गतेसम्म चल्ने जनाएको छ। अहिलेसम्म प्रतिनिधिसभा निर्वाचनका लागि ४४ र राष्ट्रियसभा निर्वाचनका लागि ९ दलले निवेदन दिएका छन्, आयोगका प्रवक्ता नारायणप्रसाद भट्टराईले जानकारी दिए।

भट्टराईले आगामी निर्वाचनका लागि जारी हुने निर्वाचन आचारसंहिताको प्रारम्भिक मस्यौदा आयोगको वेबसाइटमा राखिएको र सुझावका लागि आह्वान गरिएको पनि जानकारी दिए। प्राप्त सुझावको समीक्षा पछि आयोगले आगामी माघ १–२ गते आचारसंहिता प्रकाशित गर्ने तयारीमा छ। निर्वाचनका लागि आवश्यक सामग्री व्यवस्थापन, खरिद प्रक्रिया र अन्य तयारीहरू पनि जारी रहेका छन्।

प्रत्यक्ष निर्वाचनतर्फ उम्मेदवारको मनोनयन आगामी माघ ६ गते हुने कार्यक्रम रहेको छ। राष्ट्रियसभा सदस्य निर्वाचनमा आगामी फागुन २० मा रिक्त हुने एक तिहाइ सदस्य अर्थात् १९ मध्ये १८ सदस्यका लागि माघ ११ गते मतदान हुनेछ, जबकि बाँकी एक सदस्य राष्ट्रपतिबाट मनोनयन गरिनेछ। उम्मेदवारको मनोनयनपत्र दर्ता आगामी पुस २३ गते हुँदैछ।

निर्वाचन आयोगमा दर्ता भएका पुराना र नयाँ सबै दलले प्रतिनिधिसभा निर्वाचनका लागि छुट्टै निवेदन दिनुपर्नेछ। मतदाता नामावली मङ्सिर ५ गतेसम्म संकलन र अद्यावधिक सम्पन्न भइसकेको छ।