७ मंसिर, बाँके – आगामी फागुन २१ गते हुने प्रतिनिधिसभा सदस्य निर्वाचनका लागि बाँके जिल्लामा १८ हजार १९५ नयाँ मतदाता थपिएका छन्। जिल्ला निर्वाचन कार्यालयका अनुसार, नयाँ मतदातामध्ये ११ हजार ७०९ जना निर्वाचन कार्यालयमा दर्ता भएका छन् भने ६ हजार ४८६ जना राष्ट्रिय परिचयपत्रका आधारमा नामावलीमा थपिएका छन्।

जिल्ला निर्वाचन अधिकारी टेकबहादुर शाहीका अनुसार, नाम दर्ता गराउनेमध्ये ६ हजार ८३५ पुरुष र ५ हजार ८७४ महिला छन्। उनले मतदाताको उत्साहजनक सहभागिता देखिएको र अधिकांश १८ देखि २५ वर्ष उमेर समूहका रहेको बताए।

२०७९ सालको निर्वाचनमा बाँकेमा कुल ३ लाख ३३ हजार ९३४ मतदाता थिए। नयाँ नाम दर्ता, त्रुटि सच्याउने र स्थान परिवर्तनसम्बन्धी प्रक्रिया जारी रहेको निर्वाचन कार्यालयले जनाएको छ। नाम दर्ता गराउने प्रमुख क्षेत्रहरू नेपालगञ्ज र कोहलपुर नगरपालिकाहरू हुन्।