ऊर्जामन्त्री कुलमान घिसिङ र जेन-जी आन्दोलनबाट उदाएका नेता सुदन गुरुङबीच फेरि भेटघाट हुने भएको छ।

आइतबारदेखि यी दुईजना पटकपटक भेट गरेर एउटै पार्टी बनाउने विषयमा छलफल गरिरहेका छन्।

सोमबार र मङ्गलबार बिहान पनि गुरुङ र घिसिङबीच भेटवार्ता भएको थियो। मंगलबार बिहान भएको भेटमा गुरुङ र घिसिङले पार्टी एउटै बनाएर जाने विषयमा छलफल गरे।

तर कुलमानले आफ्नो पार्टीको नाम उज्यालो नेपाल रहने बताउँदै नेतृत्वमा पूर्वसचिव अनुपकुमार उपाध्यायलाई नै अघि सार्ने अडान राखे ।

यता गुरुङले सकेसम्म मिलेर जानुपर्ने भन्दै जेन-जीसहितका परिवारको तर्फबाट नेतृत्वमा अगाडि सारेर जानुपर्ने मत राखे । दुवैबीच बिहान पनि कुरा नमिलेपछि सुदन निस्किए । अहिले फेरि ऊर्जामन्त्री घिसिङले सुदनलाई बोलाएका छन् ।

नेताहरूका अनुसार सम्भवत: कुलमान र सुदनले दल दर्ता गर्नु अगाडि अन्तिमपटक भेट्न लागेका हुन् ।

‘बिहान पनि कुलमान र सुदन बस्नुभएको हो, अहिले फेरि उहाँ सुदन जानुभएको छ’, एक सहयोगीले खबरहबलाई भने, ‘हामीले त सुरुबाटै भनेको जे-नजी आन्दोलनको अपनत्व हुने नेतृत्व र पार्टी चाहिन्छ । कुलमान दाइ मान्नुभएको छैन। बिहान भेट भएको हो । त्यसबेला सुदन र कुलमानबीच मिलेर जानेबारे कुरा भएको हो। तर कुलमानजीले अडान छोड्नुभएन। हामीले पनि छोड्ने कुरा भएन ।’

सुदनका सहयोगीका अनुसार अहिले कुलमानले अन्तिम पटक छलफल गर्ने भन्दै बोलाएका छन् । त्यही छलफलका लागि सुदन अहिले कुलमानको निवासतिर गएका छन् ।

‘दुईजनाबीच भेटपछि सम्भवत: अलग अलग नयाँ दल दर्ता हुन्छ । नाटकीय परिवर्तन नभए कुलमानले उज्यालो नेपाल र सुदनले सहिद परिवारको प्रतिनिधि लिएर दल दर्ता गर्नुहुन्छ’, कुलमानिकट स्रोतले भन्यो, ‘तत्काललाई नभए भविष्यमा सहकार्य गर्ने वातावरण बनाएर उहाँहरूबीच कुरा मिल्छ ।’

स्रोतका अनुसार अहिले सुदनले बनाउन लागेको पार्टीमा काठमाडौँ महानगरपालिकाका मेयर बालेन्द्र साह र पूर्वसांसद सुमना श्रेष्ठ सहभागी हुने छन् । बालेन्द्र अहिले बाहिर नदेखिए पनि उनी पनि आन्तरिक तयारीमा छन् ।