जनता समाजवादी पार्टी (जसपा) नेपालका अध्यक्ष उपेन्द्र यादवले पार्टीका नेता, कार्यकर्तालाई प्रशिक्षण दिएका छन् । अध्यक्ष यादवले पार्टी स्कुल तथा प्रशिक्षण विभागको आयोजनामा जनकपुरको शुभम् होटलमा शुक्रबारसम्म चलेको तीन दिवसीय कार्यक्रममा नेता, कार्यकर्तालाई प्रशिक्षण दिएका हुन् ।  

अध्यक्ष यादवले नेपालको राजनीतिक शक्तिहरुको तुलनात्मक अध्ययन, जसपा नेपालको नीति, सिद्धान्त तथा नेतृत्व विकासलगायतका विषयमा प्रशिक्षण दिएको पार्टी प्रचार विभागले जानकारी दिएको छ ।

साथै देशको वर्तमान राजनीतिक अवस्था, दलहरुको वैचारिक दिशा, शक्ति सन्तुलन, संघीयता, गणतन्त्र तथा समसामयिक राजनीतिक चुनौतीको विषयमा अध्यक्ष यादवले प्रकाश पारेका थिए । 

कार्यक्रममा राजनीतिक विश्लेषक जय निशान्तले डिजिटल युगमा एआई तथा सोसल मिडियाको प्रयोग, नेतृत्व विकास तथा नेपालको वर्तमान घटनाक्रम तथा निर्वाचनको कुशल व्यवस्थापन सम्बन्धमा प्रशिक्षण दिएका थिए ।

अर्थशास्त्री उमाशंकर प्रसाद साहले नेपालको अर्थतन्त्रको अवस्था, संघ प्रदेशहरुबीचको विभेदपूर्ण वित्तिय हस्तान्तरणबारे प्रशिक्षण दिएको बताइएको छ । समापन समारोहमा पार्टी अध्यक्ष यादवले सहभागीहरुलाई प्रमाणपत्र वितरण गरेका थिए ।

पार्टी प्रदेश समिति, जिल्ला समिति र राष्ट्रिय समितिका पदाधिकारीहरु, सदस्यहरु, जनप्रतिनिधि तथा मनोनित सदस्यहरु प्रशिक्षणमा सहभागी रहेको सो पार्टीले जनाएको छ ।