काठमाडौँ । वामदेव गौतम नेतृत्वमा रहेको *नेपाल कम्युनिस्ट पार्टी (एकीकरण अभियान)* खारेज गरिएको छ । गौतमकै निवेदनपछि निर्वाचन आयोगले उक्त पार्टी खारेज गरेको हो ।

नेकपा (एकीकृत समाजवादी) हुँदै नेपाली कम्युनिस्ट पार्टीमा समाहित भएपछि गौतमले आयोगमा आफ्नो पार्टी खारेज गर्न औपचारिक निवेदन दिएका थिए । आयोगले सो निवेदन स्वीकृत गर्दै पार्टी दर्ता खारेज गरेको जनाएको छ ।

त्यस्तै, आयोगले *नागरिक उन्मुक्ति पार्टी, नेपाल* नयाँ दलका रूपमा आयोगमा दर्ता भएको जानकारी पनि दिएको छ । यससँगै निर्वाचन आयोगमा दर्ता भएका राजनीतिक दलको कुल सङ्ख्या **१२५** पुगेको छ ।

गौतमले नेतृत्व गरेको एकीकरण अभियान पार्टीले विगतमा बामपन्थी दलहरूबीच एकताको पहल गर्दै आएको थियो । तर, हालको राजनीतिक परिवेशमा उक्त अभियान समाप्त भएको गौतम पक्षले जनाएको छ ।