काठमाडौं — राष्ट्रिय सुरक्षा परिषद्को ४१औं बैठकपछि जारी गरिएको आधिकारिक वक्तव्यमै गम्भीर त्रुटी भेटिएको छ। बाराको सिमरामा उत्पन्न तनावका कारण बसेको बैठकले आगामी फागुन २१ गते हुने प्रतिनिधि सभा निर्वाचनका लागि अहिले नै नेपाली सेना परिचालन गर्न मन्त्रिपरिषद्लाई सिफारिस गरेको थियो। तर उक्त निर्णय सार्वजनिक गर्न तयार गरिएको वक्तव्य भने गलत मिति, अव्यवस्थित लेखाइ र असावधानीपूर्ण तयारीका कारण विवादित बनेको छ।

वक्तव्य सदस्य–सचिव तथा रक्षा मन्त्रालयका सचिव सुमनराज अर्यालको नाममा जारी गरिएको हो। तर मिति लेख्ने ठाउँमा वर्ष र महिना कम्प्युटरमा टाइप गरिएकामा ‘गते’ मात्र हातले लेखिएको छ। यस्तै, पत्रको व्यहोरामा ‘राष्ट्रिय सुरक्षा परिषद्को ४१औं बैठक २०८१/०८/०४ गते बसेको’ उल्लेख हुँदा अहिले २०८२/०८/०४ चलिरहेको अवस्थासँग मेल नखाने देखिएको छ। यसले या त पत्र पहिले नै तयार गरिएको थियो, या त अत्यधिक हतारमा गल्ती भएको शंका उठाएको छ।

प्रधानमन्त्री तथा परिषद्की अध्यक्ष सुशीला कार्कीको अध्यक्षतामा सिंहदरबारस्थित सचिवालयमा बसेको बैठकमा अर्थमन्त्री, गृहमन्त्री, मुख्यसचिव, प्रधानसेनापति र रक्षासचिवको सहभागिता थियो। बैठकले राष्ट्रिय सुरक्षा जोखिम, पछिल्ला राष्ट्रिय तथा अन्तर्राष्ट्रिय घटनाक्रम तथा आगामी रणनीतिबारे विस्तृत छलफल गरेको सचिवालयले जनाएको छ।

बैठकले आ.व. ०८१/८२ को आठौं वार्षिक प्रतिवेदनको मस्यौदामा आवश्यक संशोधन गरी स्वीकृति प्रदान गर्ने र संविधानको धारा २६६(३) अनुसार राष्ट्रपतिसमक्ष पेस गर्ने निर्णय गरेको छ। साथै, फागुन २१ गते हुने प्रतिनिधि सभा सदस्य निर्वाचनलाई स्वतन्त्र, निष्पक्ष र भयरहित बनाउन संविधानको धारा २६६(१) अनुसार नेपाली सेना परिचालन सिफारिस गर्ने निर्णय पनि गरिएको छ।

तर यस संवेदनशील विषयमा सार्वजनिक गरिएका आधिकारिक कागजातमै देखिएको लापरबाहीले राज्यका उच्च सुरक्षा निकायहरूको प्रशासनिक तयारी र सावधानीबारे प्रश्न उठाएको छ।