जनकपुरधाम, १६ असोज –मधेश प्रदेशका नवनियुक्त मुख्यमन्त्री जितेन्द्र सोनलले बिहीबार एक विशेष समारोहबीच पद तथा गोपनीयताको शपथ लिएका छन्। प्रदेश प्रमुख सुमित्रा सुवेदी भण्डारीले मुख्यमन्त्री सोनललाई पद तथा गोपनीयताको शपथ गराएकी हुन्।

लोकतान्त्रिक समाजवादी पार्टी (लोसपा)का नेता सोनल पाँच दलीय गठबन्धनको समर्थनमा बुधबार साँझ मुख्यमन्त्री नियुक्त भएका थिए। लोसपाको नेतृत्वमा बनेको उक्त गठबन्धनमा नेकपा माओवादी केन्द्र, नेकपा एमाले, जनता समाजवादी पार्टी (जसपा) र जनमत पार्टी रहेका छन्। यस गठबन्धनमा जम्मा ५६ सांसदको समर्थन रहेको छ।

एक सिट रहेको नागरिक उन्मुक्ति पार्टीले पनि मुख्यमन्त्री सोनललाई समर्थन जनाएको छ। गठबन्धनको समर्थनसाथ बनेको नयाँ सरकारले मधेश प्रदेशमा राजनीतिक स्थायित्व र विकासलाई प्राथमिकता दिने बताइएको छ।

सोनल यसअघि पनि प्रदेश सरकारमा मन्त्रीको जिम्मेवारी सम्हालिसकेका अनुभवी नेता हुन्। अबको केही दिनभित्रै उनले मन्त्रिपरिषद् विस्तार गर्ने तयारी भइरहेको छ।