काठमाडौं, असोज २७– नेपाली कांग्रेसका महामन्त्री गगन थापा र विश्वप्रकाश शर्माले पार्टी सभापति शेरबहादुर देउवासँग भेट गर्दै मंसिरमा महाधिवेशनको माग गरेका छन्। केन्द्रीय समिति बैठक अघि सानेपास्थित पार्टी मुख्यालयमा भएको छलफलमा महामन्त्रीद्वयले नेतृत्व परिवर्तनको बाटो खोल्ने गरी नियमित वा विशेष महाधिवेशनको प्रस्ताव अघि सारेका हुन्।

तर, देउवाले उक्त प्रस्तावमा कुनै स्पष्ट जवाफ नदिएको स्रोतको भनाइ छ। "सल्लाह गर्छु भन्ने सामान्य प्रतिक्रिया आएको छ," भेटमा सहभागी एक नेताले जानकारी दिए।

महामन्त्रीद्वय मंसिरमै महाधिवेशन हुनुपर्नेमा अडिग छन्। उनीहरू विशेष महाधिवेशन आह्वान गर्न आवश्यक केन्द्रीय सदस्यहरूको हस्ताक्षर पनि संकलन गरिसकेका छन्।

तर, देउवा पक्ष भने महाधिवेशन तत्काल सम्भव नभएको भन्दै समय लम्ब्याउने रणनीतिमा देखिएको छ। भेटवार्तामा पनि देउवाले कुनै टुंगो नलगाएको नेताहरूले बताएका छन्।

यसबीच, केन्द्रीय समिति बैठकका लागि नेताहरू सानेपा पुगिसकेका छन्। बैठकमा महाधिवेशनको सम्भावना र पार्टीको आन्तरिक राजनीति प्रमुख एजेन्डा बन्ने अनुमान गरिएको छ।