काठमाडौं, असोज २९ –मधेस प्रदेशमा नयाँ सरकार गठनको विषयलाई लिएर राजनीतिक हलचल तीव्र बनेको छ। नेपाली कांग्रेस, नेकपा एमाले र जनमत पार्टीको तीन दलीय गठबन्धनले बुधबार प्रदेश प्रमुखको कार्यालयमा सरकार गठनको दाबी पेश गरेसँगै सत्ता समीकरण फेरिने संकेत देखिएको छ।

यसअघि लोकतान्त्रिक समाजवादी पार्टी (लोसपा) नेतृत्वको गठबन्धनले पनि आफ्नो तर्फबाट सरकार गठनको दाबी पेश गरिसकेको थियो। अब दुई फरक गठबन्धनबीच सरकार गठनका लागि खुला शक्ति संघर्ष देखिएको छ।

दुवै पक्षको दाबीमा जनमत पार्टीको भूमिका निर्णायक बन्न पुगेको छ। कांग्रेस नेतृत्वको गठबन्धनले जनमत पार्टी आफ्नो पक्षमा रहेको दाबी गरे पनि, जनमतकै संसदीय दलका नेता महेश प्रसाद यादवले त्यसलाई अस्वीकार गरेका छन्।

कांग्रेस संसदीय दलका नेता कृष्ण कुमार यादवले भने, “जनमत पार्टी हाम्रो गठबन्धनमै छ, महेश यादवमाथि दबाब दिएर लोसपाले हस्ताक्षर गराएको हो।” तर, महेश यादवले भने कांग्रेसको दाबी “पूर्णरूपमा झुटो” भएको प्रतिक्रिया दिएका छन्।

प्रदेश प्रमुख कार्यालयका निमित्त सचिव शत्रुधन यादवका अनुसार दुवै गठबन्धनको दाबीमा जनमत पार्टीको भूमिकाबारे विवाद छ। "कानुनअनुसार प्रक्रिया अघि बढाइनेछ", उनले भने।

नेकपा एमाले संसदीय दलका नेता सरोज यादवले लोसपाको दाबी अविश्वसनीय रहेको टिप्पणी गर्दै भने, “दबाबमा गरिएको दाबी वैधानिक हुँदैन। जनमत हाम्रो गठबन्धनमै छ, र जसपाका नेताहरू लोसपा पक्षको दाबीमा सहभागी पनि थिएनन्।”

दुई फरक गठबन्धनको सरकार दाबीपछि अब अन्तिम निर्णय प्रदेश प्रमुखको कदममा निर्भर हुने देखिएको छ। विवादित परिस्थितिमा प्रदेश प्रमुखले कुन दाबी वैधानिक र विश्वासको मतप्राप्त ठान्छन् भन्ने कुराले आगामी सरकारको नेतृत्व तय गर्नेछ।