काठमाडौं, २९ असोज — प्रतिनिधिसभा पुनःस्थापनाको विषयमा सभामुख देवराज घिमिरेले बोलाएको प्रमुख राजनीतिक दलहरूको बैठकमा राष्ट्रिय प्रजातन्त्र पार्टी (राप्रपा) ले *जेनजी आन्दोलन*का मागहरू पूरा हुनुपर्ने शर्त राखेको छ।

बैठकमा सहभागी भएका राप्रपाका प्रवक्ता ज्ञानेन्द्र शाहीले सभामुखसमक्ष जेनजीका मागहरू सुनिश्चित नगरी संसद पुनःस्थापनाको प्रक्रियालाई अघि बढाउन नहुने धारणा राखेका हुन्। उनले भने, "संसदलाई निरन्तरता दिने वा पुनःस्थापना गर्ने बहसभन्दा पहिला देशलाई सही दिशा दिन आवश्यक सुधारका एजेन्डा प्राथमिक हुनुपर्छ।"

सभामुख घिमिरेले संघीय संसद सचिवालय, सिंहदरबारमा ११ वटा प्रमुख राजनीतिक दलका पूर्व प्रमुख सचेतकहरूलाई बोलाएर संसद पुनःस्थापनाको संवैधानिक, राजनीतिक र प्रक्रियागत पक्षमा छलफल गरेका थिए।

राप्रपातर्फबाट सहभागी शाहीले ८ बुँदे संरचनागत सुधारको खाका प्रस्तुत गर्दै, ती माग संसदबाट पूरा हुने निश्चितता नआएसम्म पुनःस्थापनाको प्रक्रिया रोक्नुपर्नेमा जोड दिए। राप्रपाले संसदको पुनःस्थापना केवल सत्ता समीकरणको लागि नभई, *नीतिगत परिवर्तन र जनअपेक्षाअनुसारको सुधार प्रक्रिया*को रूपमा अघि बढ्नुपर्ने तर्क राखेको छ।

बैठकमा नेपाली कांग्रेस, नेकपा एमाले, माओवादी केन्द्र, जसपा, जनमत, नागरिक उन्मुक्ति लगायत दलका प्रतिनिधिहरू सहभागी थिए भने केही दलहरू अनुपस्थित रहेका थिए।