संखुवासभामा आगलागी हुँदा १९ लाख रूपैयाँ बढीको क्षति
काठमाडौं । संखुवासभाको चैनपुर नगरपालिका र मकालु गाउँपालिकामा शुक्रबार राति आगलागी हुँदा १९ लाख भन्दा बढी रुपैयाँको क्षति भएको छ ।
शुक्रबार राति मकालु गाउँपालिका–५ खोकताक र चैनपुर नगरपालिका–२ तिखिढुंगामा भएको आगलागीबाट १९ लाख भन्दा बढी रुपयाँको क्षति भएको जिल्ला प्रहरी कार्यालय संखुवासभाले जनाएको हो । शुक्रबार राति विद्युत् सट भएर आगलागी हुँदा खोकताकमा स्थानीय भीमबहादुर तामाङको घर जलेर नष्ट हुँदा ११ लाख भन्दा बढीको क्षति भएको मकालु–५ का वडाध्यक्ष योगराज राईले जानकारी दिनुभयो ।
आगलागीबाट तामाङको घरमा भएको सुन-चाँदी, भाडा-कुँडा, खाद्यान्न र लत्ता-कपडासहितका सम्पूर्ण सामान जलेर नष्ट भएकोे छ । र तामाङकी श्रीमती भीममाया तामाङ गम्भीर घाइते भएकी वडाध्यक्ष राईले बताउनुभयो । त्यसैगरी चैनपुर नगरपालिका–२ तिखिढुंगामा स्थानीय झलकबहादुर अधिकारीको घर जलेर ८ लाख भन्दा बढीको क्षति भएको प्रहरीले बताएको छ ।
आगलागीबाट अधिकारीको घरमा भएको खाद्यान्न, लत्ताकपडासहित सम्पूर्ण सामान जलेर नष्ट भएको हो । केही दिनयता भएका आगलागीबाट मकालु गाउँपालिका–४ र वडा नम्बर ५ मा ४ वटा घर जलेको प्रहरीले बताएको छ ।