Bangladesh मा ‘डोनाल्ड ट्रम्प’ नाम राखिएको एउटा भैँसी सामाजिक सञ्जालमा भाइरल बनेपछि सरकारले त्यसलाई बलि दिन रोक लगाएको छ।

इद–उल–अजहा (बकर–ईद) का अवसरमा बलि दिन तयारी गरिएको उक्त भैँसी नारायणगन्जस्थित राबिया एग्रो फार्ममा पालिएको थियो। भैँसीका मालिक जियाउद्दिनका अनुसार यसको सुनौलो कपाल र रूपरङ अमेरिकी राष्ट्रपति Donald Trump सँग मिल्ने भएकाले मजाकका रूपमा ‘डोनाल्ड ट्रम्प’ नाम राखिएको थियो।

सामाजिक सञ्जालमा भिडियो भाइरल भएपछि भैँसी हेर्न मानिसहरूको भिड लाग्न थालेको थियो। करिब ७०० केजी तौल भएको उक्त भैँसी साढे तीन लाख रुपैयाँभन्दा बढीमा बिक्री भएको बताइएको छ।

घटनाले अन्तर्राष्ट्रिय चर्चा पाएपछि बंगलादेश सरकारले चासो देखाएको हो। इरानमा समेत उक्त भैँसीको तस्वीर प्रयोग गरेर अमेरिकी राष्ट्रपतिको व्यंग्य गरिएको रिपोर्ट सार्वजनिक भएपछि विवाद थप चर्किएको थियो।

विवाद बढेपछि बंगलादेशका गृहमन्त्री सलाहउद्दिन अहमदको निर्देशनमा सरकारले भैँसीको बलि रोक्ने निर्णय गरेको जनाएको छ। प्रहरीले खरिदकर्तालाई रकम फिर्ता गराएर भैँसी आफ्नो नियन्त्रणमा लिएको छ।

हाल उक्त भैँसीलाई ढाकास्थित राष्ट्रिय चिडियाखानामा राखिएको छ। चिडियाखानाका अधिकारीहरूका अनुसार यो दुर्लभ ‘एल्बिनो’ प्रजातिको भैँसी भएकाले विशेष निगरानी र हेरचाहको व्यवस्था गरिएको छ।