परराष्ट्रमन्त्री शिशिर खनालले जलवायु परिवर्तनका असरबाट पर्वतीय क्षेत्रलाई जोगाउन अनुकूलन वित्तको परिचालन र पहुँच विस्तार गर्नुपर्नेमा जोड दिएका छन् ।

टर्किएको अन्ताल्यामा सोमबारदेखि सुरु भएको जलवायु परिवर्तनसम्बन्धी संयुक्त राष्ट्रसङ्घीय सम्मेलन (कोप–३१) का अवसरमा आयोजित उच्चस्तरीय कार्यक्रममा सम्बोधन गर्दै उनले पर्वतीय क्षेत्रको उत्थानशीलता सुदृढ गर्न पर्याप्त जलवायु वित्त आवश्यक रहेको बताएका हुन् ।

नेपाल, भुटान र किर्गिस्तानले इसिमोड तथा जोई इन्भारोन्मेन्ट नेटवर्कसँगको सहकार्यमा आयोजना गरेको कार्यक्रममा मन्त्री खनालले हालै नेपालमा आएको विनाशकारी ‘हिमाली सुनामी’बाट भएको आर्थिक, भौतिक तथा मानवीय क्षतिको चर्चा गरे ।

उनले जलवायु परिवर्तनका बढ्दो प्रभावसँग जुध्न क्षेत्रीय तथा विश्वव्यापी ऐक्यबद्धता र सहकार्य आवश्यक रहेको उल्लेख गरे ।

विश्वको करिब एकतिहाइ जनसङ्ख्या पर्वतीय पारिस्थितिक प्रणालीमा निर्भर रहेको भन्दै उनले संयुक्त राष्ट्रसङ्घीय जलवायु परिवर्तन प्रक्रियामा पर्वतीय क्षेत्रको उत्थानशीलतालाई प्राथमिकतामा राख्नुपर्ने बताए ।

साथै, जलवायु अनुकूलनका लागि पूर्वानुमानयोग्य र सहज पहुँचयोग्य वित्तको मात्रा बढाउन तथा विश्वको तापक्रम वृद्धिलाई १.५ डिग्री सेल्सियसमा सीमित राख्ने लक्ष्य हासिल गर्न अन्तर्राष्ट्रिय समुदायलाई उनले आह्वान गरे ।