काठमाडौं । आगामी मङ्सिर १६ देखि २७ गतेसम्म कर्णाली प्रदेशमा आयोजना हुने दसौँ राष्ट्रिय खेलकुद प्रतियोगिताका लागि गण्डकी प्रदेशले २२ आर्चरी खेलाडी छनोट गरेको छ ।

पोखरा रङ्गशालामा दुई दिनसम्म सञ्चालन भएको छनोट प्रतियोगिताबाट १२ पुरुष र १० महिला खेलाडी छनोट भएका हुन् । प्रतियोगितामा कास्की, बागलुङ, म्याग्दी र मुस्ताङका ३४ खेलाडी सहभागी थिए ।

रिकर्भ ओपन पुरुषतर्फ अशिम शेरचन र महिलातर्फ रोजिना थापा मगरले सर्वाधिक अङ्क प्राप्त गर्दै छनोटमा शीर्ष स्थान हासिल गरे । त्यस्तै कम्पाउण्ड पुरुषतर्फ सुरेश गुरुङ तथा स्ट्यान्डर्ड विधाका खेलाडीहरू पनि छनोट भएका छन् ।

छनोट भएका खेलाडीले दसौँ राष्ट्रिय खेलकुदमा गण्डकी प्रदेशको प्रतिनिधित्व गर्नेछन् । यसैबीच, प्रदेशका अन्य खेल सङ्घहरूले पनि खेलाडी छनोट तथा प्रतियोगिताको तयारी अघि बढाएका छन् ।