वैदेशिक रोजगारीका लागि विभिन्न देश पठाइदिने प्रलोभन देखाएर रकम ठगी गरेको आरोपमा प्रहरीले चार जनालाई पक्राउ गरेको छ।

पक्राउ पर्नेमा आशिका सिम्खडा, विष्णु खत्री, दिनेश पाख्रेन तामाङ र राजेश बराम रहेका छन्।

प्रहरीका अनुसार उनीहरूले बेलायत, माल्टा, यूएई र सिङ्गापुर पठाइदिने भन्दै पीडितबाट क्रमशः ७ लाख ५० हजार, ६ लाख, २ लाख र १५ लाख ५० हजार रुपैयाँ लिएका थिए।

विदेश नपठाई रकम लिएर सम्पर्कविहीन भएको उजुरीका आधारमा उनीहरूलाई काठमाडौं उपत्यकाका विभिन्न स्थानबाट पक्राउ गरिएको हो। घटनाबारे थप अनुसन्धान भइरहेको प्रहरीले जनाएको छ।