काठमाडौं । प्रधानमन्त्री तथा मन्त्रिपरिषद्को कार्यालयको आधिकारिक विवरणअनुसार प्रधानमन्त्रीको सचिवालय, सल्लाहकार तथा विज्ञ टोलीमा २५ जना पदाधिकारी तथा कर्मचारी कार्यरत छन्।

प्रधानमन्त्री कार्यालयको वेबसाइटमा सार्वजनिक विवरणअनुसार २५ सदस्यीय टोलीमा मन्त्रीसरहको सुविधा तथा दर्जा पाउने तीन जना, राज्यमन्त्रीसरहका दुई जना तथा विभिन्न प्रशासनिक, प्राविधिक र सल्लाहकार तहका कर्मचारी रहेका छन्।

सल्लाहकार समूहमा कुमार व्यञ्जनकार अवैतनिक मुख्य सल्लाहकार र असिम शाह राजनीतिक सल्लाहकारका रूपमा मन्त्रीसरहको पदमा छन्। नीति, प्रशासन तथा सुशासन सल्लाहकार सुदीप ढकाल र सूचना तथा सञ्चार प्रविधि सल्लाहकार विवेक मिश्र राज्यमन्त्रीसरहको श्रेणीमा रहेका छन्। विज्ञ समूहअन्तर्गत प्रा.डा. जगदिशप्रसाद अग्रवाल अवैतनिक स्वास्थ्य सल्लाहकारका रूपमा मन्त्रीसरहको श्रेणीमा छन्।

प्रधानमन्त्रीको स्वकीय सचिवालयको प्रशासनिक नेतृत्व प्रमुख स्वकीय सचिव सुवाष शर्माले गरेका छन्। उनी राजपत्राङ्कित विशिष्ट श्रेणीको पदमा छन्। सचिवालयमा राजपत्राङ्कित प्रथम श्रेणीसरहका नवीन भण्डारी, सञ्जिव पाण्डे, दिपा दाहाल, सन्तोष गिरी र विश्व राईसहितका पदाधिकारी कार्यरत छन्।

त्यस्तै, राजपत्राङ्कित द्वितीय श्रेणीसरहको पदमा प्रकृति ढकाल, विशाल अधिकारी, सुमन गौतम, रवि किरण अधिकारी र विनय शाक्य रहेका छन्। राजपत्राङ्कित तृतीय श्रेणीसरहको शाखा अधिकृत तहमा सुरेन्द्र बजगाईं, रोसन तामाङ, बेदानन्द जोशी र हेम नारायणदास चौधरी कार्यरत छन्।

सचिवालयको प्राविधिक तथा प्रशासनिक सहयोगका लागि राजपत्रअनङ्कित प्रथम श्रेणीसरहको पदमा अनुप थापा मगर, ऋषी थापा, राजकुमार गौतम, बेनिस कार्की र कम्प्युटर सहायक तथा भिडियो सम्पादकका रूपमा अमृत पाण्डे रहेका छन्।