तास खेलिरहेको अवस्थामा पक्राउ परेका विराटनगरका एक जनाको उपचारका क्रममा मृत्यु
तास खेलिरहेको अवस्थामा पक्राउ परेका विराटनगर महानगरपालिका–१४ का ५५ वर्षीय बलराम कोइरालाको उपचारका क्रममा मृत्यु भएको छ।
सोमबार राति तास खेलिरहेको अवस्थामा पक्राउ परेका कोइरालासहित आठ जनालाई जिल्ला प्रहरी कार्यालय मोरङको हिरासतमा राखिएको थियो। मंगलबार बिहान करिब साढे ७ बजे हिरासतमा रहेका अन्य व्यक्तिहरूले चिया खान उठाउन खोज्दा कोइराला नबोलेपछि अचेत अवस्थामा रहेको थाहा भएको प्रहरीले जनाएको छ।
त्यसपछि उनलाई तत्काल कोशी अस्पताल लगिएको थियो। त्यहाँ उपचार सम्भव नभएपछि थप उपचारका लागि नोबेल शिक्षण अस्पताल रेफर गरिएको थियो। नोबेलमा उपचारकै क्रममा मंगलबार बिहान करिब ११ बजे चिकित्सकले उनलाई मृत घोषणा गरेको जिल्ला प्रहरी कार्यालय मोरङका सूचना अधिकारी डीएसपी मकेन्द्रकुमार मिश्रले जानकारी दिए।
मोरङ प्रहरी प्रमुख एसपी कवित कटवालका अनुसार विराटनगर–६ सरोचियास्थित लालु पासवानको घरमा सोमबार राति प्रहरीको गस्ती टोली पुगेपछि भागदौड भएको थियो। प्रहरी आएको भन्दै होहल्ला भएपछि भाग्ने क्रममा कोइराला लडेको उनले बताए। प्रहरीका अनुसार कोइरालाको यसअघि सडक दुर्घटनामा परी टाउकोको शल्यक्रियासमेत गरिएको थियो।
