काठमाडौं । सात महिनादेखि जारी युद्ध अन्त्य गर्दै युद्धविराम र शान्ति वार्ता अघि बढाउने प्रयासस्वरूप अमेरिका र इरानका अधिकारीहरूले सोमबार मध्यस्थकर्तामार्फत छुट्टाछुट्टै छलफल गरेका छन्।

रोयटर्सका अनुसार छलफल गत साता संयुक्त राष्ट्रसंघको महासभाका क्रममा इरानले प्रस्तुत गरेको सातदिने युद्धविराम प्रस्तावको संशोधित स्वरूपमा केन्द्रित हुन सक्नेछ। इरानले युद्धविरामसँगै रोक्का सम्पत्ति फुकुवा, तेलमाथिको प्रतिबन्ध हटाउने र इरानी बन्दरगाहमाथिको अमेरिकी नाकाबन्दी अन्त्य गर्नुपर्ने प्रस्ताव गरेको छ।

यसको बदलामा इरानले तेल ढुवानीका लागि महत्वपूर्ण स्ट्रेट अफ हर्मुज पुनः खोल्ने प्रस्ताव गरेको छ। साथै आणविक कार्यक्रमबारे पुनः वार्ता गर्न पनि इरान तयार रहेको जनाएको छ।

अमेरिकी राष्ट्रपति डोनाल्ड ट्रम्पले शनिबार इरानको प्रस्ताव अस्वीकार गरेको बताएका थिए। तर आइतबार उनले अमेरिकी वार्ताकारहरूले यही साता इरानी पक्षसँग थप छलफल गर्ने अपेक्षा रहेको बताएका छन्।

इरानी विदेशमन्त्री अब्बास अराघ्चीले भने अमेरिकाको स्पष्ट जवाफ आएपछि मात्रै आगामी कदमबारे निर्णय गरिने बताएका छन्। उनका अनुसार गतिरोधको समाधान वार्तामार्फत मात्रै सम्भव छ।