काठमाडौं । परराष्ट्रमन्त्री शिशिर खनाल संयुक्त राष्ट्रसङ्घको ८१औँ महासभामा सहभागी भएर बुधबार बिहान स्वदेश फर्किएका छन् ।

मन्त्री खनाल महासभा तथा त्यस अवसरमा आयोजित विभिन्न उच्चस्तरीय कार्यक्रम र द्विपक्षीय बैठकमा सहभागी हुन असोज ४ गते संयुक्त राज्य अमेरिकाको न्युयोर्क प्रस्थान गरेका थिए ।

भ्रमणका क्रममा उनले नेपालको तर्फबाट ‘सगरमाथादेखि समुद्रसम्मः जलवायु उत्थानशील भविष्यका लागि आवश्यक कार्यको आह्वान’ विषयक जलवायु केन्द्रित उच्चस्तरीय विशेष कार्यक्रम आयोजना गरेका थिए ।

यस्तै, उनले विभिन्न मुलुकका समकक्षीसँग भेटवार्ता गर्दै आपसी हितका विषयमा छलफल गर्नुका साथै विभिन्न द्विपक्षीय बैठकमा सहभागिता जनाएका थिए ।

परराष्ट्र मन्त्रालयका अनुसार महासभामा सक्रिय सहभागिता, उच्चस्तरीय भेटवार्ता तथा छलफलमार्फत नेपालका प्राथमिकता र चासोका विषय अन्तर्राष्ट्रिय मञ्चमा प्रस्तुत गरिएको छ ।