काठमाडौं । नेपालका गोकर्णेश्वर नगरपालिकाका नगर प्रमुख दीपककुमार रिसालसहितको प्रतिनिधिमण्डलले थाइल्यान्डको क्लोङ साम उपजिल्ला प्रशासनिक संगठनको भ्रमण गरी स्थानीय शासन प्रणाली, शिक्षा, स्वास्थ्य तथा विपद् व्यवस्थापनका अभ्यासबारे जानकारी लिएको छ। युनिभर्सल गुडनेस अर्गनाइजेसनको समन्वयमा भएको भ्रमणका क्रममा नेपाली प्रतिनिधिमण्डलले क्लोङ सामका स्थानीय प्रशासनिक टोली, विभिन्न विभागका प्रमुख तथा परिषद् सदस्यहरूसँग भेटघाट गरी स्थानीय शासन सञ्चालन तथा सेवा प्रवाहका विषयमा अनुभव आदान-प्रदान गरेको हो।

१८ अगस्ट २०२६ मा भएको भ्रमणको मुख्य उद्देश्य नेपाल र थाइल्यान्डका स्थानीय तहबीच अन्तर्राष्ट्रिय सहकार्य प्रवर्द्धन गर्नुका साथै स्थानीय शासनका प्रभावकारी अभ्यास, सेवा प्रवाह र सामुदायिक विकासका अनुभव एकअर्काबीच आदान–प्रदान गर्नु रहेको जनाइएको छ।

भ्रमणका क्रममा नेपाली प्रतिनिधिमण्डलले क्लोङ साम उपजिल्ला प्रशासनिक संगठनअन्तर्गत रहेका विभिन्न विभाग तथा संस्थाहरूको अवलोकन गरेको थियो। प्रतिनिधिमण्डलले स्थानीय प्रशासनिक संरचना, जनसेवा प्रवाह तथा स्थानीय सरकारमार्फत सञ्चालन भइरहेका विभिन्न कार्यक्रमबारे प्रत्यक्ष जानकारी लिएको थियो।

प्रतिनिधिमण्डलले शिक्षा, धर्म तथा संस्कृति विभागको समेत अवलोकन गरेको थियो। सो क्रममा स्थानीय शिक्षा प्रणाली, युवाको क्षमता विकास तथा समुदायमा सञ्चालन भइरहेका शिक्षा र सांस्कृतिक कार्यक्रमबारे जानकारी लिइएको थियो।

त्यसैगरी विपद् रोकथाम तथा न्यूनीकरण विभागमा पुगेर विपद्का समयमा अपनाइने सुरक्षा उपाय, पूर्वतयारी, उद्धार तथा विपद् व्यवस्थापन प्रणालीबारे जानकारी लिइएको थियो। विपद्को जोखिम न्यूनीकरण तथा आपत्कालीन अवस्थामा स्थानीय प्रशासनले खेल्ने भूमिकाबारे समेत प्रतिनिधिमण्डलले अध्ययन गरेको जनाइएको छ।

भ्रमणका क्रममा आपत्कालीन चिकित्सा सेवा इकाइको समेत अवलोकन गरिएको थियो। त्यहाँ स्थानीय नागरिकलाई आपत्कालीन अवस्थामा छिटो स्वास्थ्य सेवा उपलब्ध गराउने उद्धार प्रणाली, स्वास्थ्यकर्मीको परिचालन तथा तत्काल चिकित्सा सेवा उपलब्ध गराउने प्रक्रियाबारे जानकारी लिइएको थियो।

त्यसपछि प्रतिनिधिमण्डलले क्लोङ साम उपजिल्ला स्वास्थ्य प्रवर्द्धन अस्पताल, मुआङ-८ को भ्रमण गरेको थियो। अस्पतालमा समुदायस्तरमा सञ्चालन भइरहेका आधारभूत स्वास्थ्य सेवा, जनस्वास्थ्य व्यवस्थापन तथा रोग रोकथाम र स्वास्थ्य प्रवर्द्धनसम्बन्धी कार्यक्रमबारे नेपाली प्रतिनिधिमण्डलले जानकारी प्राप्त गरेको थियो।

भ्रमणका क्रममा स्थानीय प्रशासन, शिक्षा, स्वास्थ्य, विपद् व्यवस्थापन तथा सामुदायिक विकासका क्षेत्रमा अपनाइएका अभ्यासबारे प्रत्यक्ष जानकारी लिनुका साथै दुवै देशका स्थानीय तहका अनुभव र सिकाइबारे छलफल भएको थियो। स्थानीय तहबाट नागरिकलाई प्रभावकारी सेवा उपलब्ध गराउने विषयमा भएका अभ्यासहरू एकअर्काका लागि उपयोगी हुने बताइएको छ।

युनिभर्सल गुडनेस अर्गनाइजेसनले नेपाल र थाइल्यान्डका स्थानीय तहबीच अनुभव, ज्ञान तथा असल अभ्यास आदान-प्रदानका लागि भ्रमणको समन्वय तथा सहजीकरण गरेको हो। संस्थाको समन्वयमा भएको यस भ्रमणले दुई देशका स्थानीय तहबीच प्रत्यक्ष सम्बन्ध विस्तार गर्नुका साथै शिक्षा, स्वास्थ्य, विपद् व्यवस्थापन तथा सामुदायिक विकासका क्षेत्रमा आगामी दिनमा सहकार्यका सम्भावना खोज्ने आधार तयार गरेको छ।

नेपाल र थाइल्यान्डका स्थानीय तहबीच भएको यस प्रकारको प्रत्यक्ष अनुभव आदान–प्रदानले स्थानीय शासन प्रणाली, जनसेवा प्रवाह र समुदायकेन्द्रित विकासका क्षेत्रमा नयाँ सिकाइको अवसर सिर्जना गरेको छ। भ्रमणले दुई देशबीचको सम्बन्धलाई स्थानीय तहबाटै थप मजबुत बनाउँदै आगामी दिनमा सहकार्यका नयाँ बाटो खोल्ने अपेक्षा गरिएको छ।