काठमाडौं — अग्रगामी मोर्चाले जनमत पार्टीका अध्यक्ष डा. चन्द्रकान्त (सीके) राउतलाई मोर्चाको प्रवक्ताको जिम्मेवारी दिएको छ।

मंगलबार बसेको मोर्चाको बैठकले राउतलाई प्रवक्ता बनाउने निर्णय गरेको हो। बैठकमा नेकपा छाडेका नेता जनार्दन शर्मासहित मोर्चामा आबद्ध दलका नेताहरू सहभागी थिए।

बैठकले आगामी प्रदेश निर्वाचनसम्म मोर्चामा आबद्ध कुनै पनि दल सरकारमा सहभागी नहुने निर्णयसमेत गरेको छ। मोर्चाले तत्काल सरकारमा सहभागी हुनुभन्दा निर्वाचन केन्द्रित राजनीतिक गतिविधिलाई प्राथमिकता दिने जनाएको छ।

मोर्चामा उपेन्द्र यादव नेतृत्वको जनता समाजवादी पार्टी, सीके राउत नेतृत्वको जनमत पार्टी, प्रभु साह नेतृत्वको आम जनता पार्टी, नागरिक उन्मुक्ति पार्टी, प्रगतिशील लोकतान्त्रिक पार्टी, नेपाल संघीय समाजवादी पार्टी, बहुजन एकता पार्टी र खम्बुवान राष्ट्रिय मोर्चा आबद्ध छन्।

सरकारमा सहभागी नहुने निर्णयसँगै मोर्चाले आगामी प्रदेश निर्वाचनलाई लक्षित गर्दै संगठन विस्तार, राजनीतिक अभियान तथा जनतामाझ आफ्नो एजेन्डा लैजाने तयारी अघि बढाउने संकेत गरेको छ।

अब मोर्चाले साझा राजनीतिक एजेन्डा र निर्वाचन रणनीति कसरी अघि बढाउँछ भन्ने विषयलाई राजनीतिक वृत्तमा चासोका साथ हेरिएको छ।