काठमाडौं । प्रेस काउन्सिल नेपालले आस्था मिडियाका अध्यक्ष तथा ‘जनआस्था’ साप्ताहिकका सम्पादक किशोर श्रेष्ठ पक्राउ परेको र सञ्चारमाध्यमको कार्यालयमा हातहतियारसहित प्रवेश गरी सामग्री जफत गरिएको घटनाप्रति गम्भीर ध्यानाकर्षण जनाएको छ।

काउन्सिलले बिहीबार विज्ञप्ति जारी गर्दै श्रेष्ठको निजी निवासमा खानतलासी तथा जनआस्था कार्यालयमा प्रवेश गरी कम्प्युटरलगायत सामग्री जफत गरिएको घटनाबारे ध्यानाकर्षण भएको जनाएको हो।

नागरिकको सूचनाको हक प्रेस स्वतन्त्रताबाट प्रत्याभूत हुने भन्दै काउन्सिलले प्रेसको मर्यादा कायम राख्नु सबै पक्षको जिम्मेवारी रहेको जनाएको छ। साथै पत्रकार तथा सञ्चारमाध्यमले प्रेस स्वतन्त्रताको प्रयोग गर्दा पत्रकार आचारसंहिता र पेसागत मर्यादा पालना गर्नुपर्नेमा जोड दिएको छ।

काउन्सिलले समाचारप्रति चित्त नबुझे सम्बन्धित पक्षलाई कानुनी प्रक्रियाअनुसार काउन्सिलमा उजुरी गर्न आग्रह गरेको छ। आचारसंहिता उल्लङ्घन भए खण्डन, भूलसुधार, क्षमायाचना, सचेत गराउने तथा आवश्यक अन्य कारबाही गर्न सकिने व्यवस्था रहेको पनि काउन्सिलले जनाएको छ।