काठमाडौं । नेपाली कांग्रेसका सभापति शेरबहादुर देउवा पाँच महिनापछि बिहीबार नेपाल फर्किएका छन्। उपचारका लागि श्रीमती डा. आरजु राणा देउवासहित विदेश गएका देउवा बिहीबार एक्लै काठमाडौं आइपुगेका हुन्।

देउवा नेपाल फर्किएसँगै कांग्रेसको आन्तरिक राजनीति र आगामी राजनीतिक गतिविधिबारे चासो बढेको छ। उनी संस्थापनइतर समूहले शुक्रबार आयोजना गर्न लागेको राष्ट्रिय भेलामा सहभागी भएर सम्बोधन गर्ने कार्यक्रम रहेको छ।

राष्ट्रिय भेलामा नेपाली कांग्रेसको वर्तमान राजनीतिक अवस्था, पार्टी संगठनको अवस्था तथा आगामी राजनीतिक रणनीतिका विषयमा छलफल हुने बताइएको छ। भेलामा पार्टीका नेता तथा कार्यकर्ताको सहभागिता रहनेछ।

पाँच महिनापछि स्वदेश फर्किएका देउवाले भेलामार्फत पार्टीको वर्तमान अवस्था र आगामी राजनीतिक दिशाबारे आफ्नो धारणा राख्ने अपेक्षा गरिएको छ। पछिल्लो समय कांग्रेसभित्र संगठन, नेतृत्व र आगामी रणनीतिका विषयमा बहस चलिरहेका बेला देउवाको स्वदेश फिर्तीलाई अर्थपूर्ण रूपमा हेरिएको छ।

देउवा उपचारका लागि विदेशमा रहेका कारण पछिल्लो समय पार्टीका विभिन्न गतिविधिमा उनको प्रत्यक्ष सहभागिता सीमित थियो। अब नेपाल फर्किएसँगै पार्टीका आन्तरिक गतिविधिमा उनको सक्रियता बढ्ने देखिएको छ।