पोखरा । नेकपा एमालेले गण्डकी प्रदेश सरकारबाट बाहिरिने निर्णय गरेको छ। मंगलबार बसेको एमाले गण्डकी संसदीय बोर्डको बैठकले सरकारमा सहभागी आफ्ना चार मन्त्रीलाई फिर्ता बोलाउने निर्णय गरेको हो।

एमाले सांसद सुधीर पौडेलका अनुसार भौतिक पूर्वाधार तथा यातायात व्यवस्थामन्त्री गोविन्दबहादुर नेपाली, उद्योग तथा पर्यटनमन्त्री यशोदा रिमाल, कृषिमन्त्री भीमबहादुर कार्की र स्वास्थ्यमन्त्री लक्ष्मणबहादुर पाण्डेलाई मंगलबार नै फिर्ता बोलाउने निर्णय गरिएको हो।

सबै प्रदेशमा एमाले र नेपाली कम्युनिष्ट पार्टी (नेकपा) बीच सत्ता सहकार्य गर्ने सहमति बनेपछि एमालेले गण्डकी सरकारबाट बाहिरिने निर्णय गरेको हो। गण्डकीमा यसअघि कांग्रेस र एमालेको गठबन्धनबाट कांग्रेसका सुरेन्द्रराज पाण्डेको नेतृत्वमा सरकार बनेको थियो।

एमाले सरकारबाट बाहिरिए पनि मुख्यमन्त्री पाण्डे नेतृत्वको सरकारलाई तत्काल बहुमतको संकट नपर्ने कांग्रेस नेताहरूको दाबी छ। सरकारलाई राष्ट्रिय प्रजातन्त्र पार्टी (राप्रपा) का दुई र नेपाल समाजवादी पार्टी (नेसपा) का एक सांसदको समर्थन कायमै छ।

६० सदस्यीय गण्डकी प्रदेशसभामा मनाङबाट स्वतन्त्र निर्वाचित सांसद राजीव गुरुङ ‘दीपक मनाङे’ पदमुक्त भएपछि अहिले ५९ सांसद छन्। सरकार गठनका लागि ३० सांसदको समर्थन आवश्यक पर्छ।

गण्डकीमा नेपाली कांग्रेस २७ सिटसहित सबैभन्दा ठूलो दल हो भने एमालेसँग २२ सिट छ। कुनै पनि दलसँग एकल बहुमत छैन।

एमाले र नेपाली कम्युनिष्ट पार्टीबीच सत्ता सहकार्यको सहमति भए पनि नयाँ सरकार गठनका लागि आवश्यक बहुमत जुटाउन राप्रपाको समर्थन निर्णायक देखिएको छ। एमालेको नेतृत्वमा सरकार बनाउन नेकपाका सभामुखबाहेक ६ र राप्रपाका दुई सांसदको समर्थन आवश्यक पर्छ। तर राप्रपाले नयाँ गठबन्धनलाई समर्थन गर्ने निर्णय गरिसकेको छैन।

यसअघि कांग्रेस र एमालेबीच भएको सहमतिअनुसार २०८३ असार मसान्तपछि मुख्यमन्त्री सुरेन्द्रराज पाण्डेले एमाले नेता खगराज अधिकारीलाई सत्ता हस्तान्तरण गर्ने सहमति थियो। तर केन्द्रमा विकसित नयाँ राजनीतिक समीकरणका कारण उक्त सहमतिअनुसार सत्ता हस्तान्तरण हुन सकेन।

एमाले अध्यक्ष केपी शर्मा ओली र नेकपा संयोजक पुष्पकमल दाहाल ‘प्रचण्ड’बीच साउन ९ गते प्रदेश सरकारमा सत्ता भागबन्डा गर्ने सहमति बनेपछि गण्डकीमा अधिकारीलाई मुख्यमन्त्री बनाउने प्रयास अघि बढेको थियो। तर नयाँ सरकार गठनका लागि राप्रपाको समर्थन अपरिहार्य भएपछि एमाले–नेकपा गठबन्धनको प्रयास तत्काल सहज देखिएको छैन।

यसैबीच एमाले सरकारबाट बाहिरिएपछि मुख्यमन्त्री पाण्डेले नेसपाका एक मात्र सांसद फणिन्द्र देवकोटालाई मन्त्री नियुक्त गर्ने तयारी गरेको कांग्रेस स्रोतले जनाएको छ।

एमालेको बहिर्गमनसँगै गण्डकी प्रदेशमा केन्द्रमा बनेको एमाले–नेकपा सहकार्यको प्रभाव देखिन थालेको छ। तर नयाँ सत्ता समीकरणका लागि आवश्यक बहुमत जुटाउने वा पुरानै सरकारलाई निरन्तरता दिने विषयमा राप्रपाको निर्णय निर्णायक हुने देखिएको छ।