काठमाडौं, २२ असार — श्रम संस्कृति पार्टीका अध्यक्ष हर्कराज राईले संविधानका आधारभूत संरचनालाई यथावत राख्दै आवश्यक विषयमा मात्र संशोधन गर्नुपर्ने बताएका छन्।

प्रतिनिधिसभाको सोमबारको बैठकमा उनले संविधान संशोधनका विषयमा सबै पक्ष गम्भीर हुनुपर्ने उल्लेख गर्दै आधारभूत संरचनामा परिवर्तन गर्दा समस्या उत्पन्न हुन सक्ने चेतावनी दिए।

राईले सरकारको पहिलो १०० दिनमा सुशासन, भ्रष्टाचार नियन्त्रण र सेवा प्रवाह सुधारका प्रयासको प्रशंसा गर्दै दार्चुला–टिङ्कर सडक निर्माणलाई तीव्रता दिन आग्रह गरे। उनले भूमिहीन तथा सुकुम्बासीलाई लालपुर्जा वितरण, बीपी कोइराला स्वास्थ्य विज्ञान प्रतिष्ठानलाई विश्वविद्यालयका रूपमा विकास गर्न र स्वास्थ्य सेवा विकेन्द्रित बनाउन पनि सरकारको ध्यानाकर्षण गराए।