स्वदेशी जुत्ता–चप्पल उद्योग प्रवर्द्धनमा सरकारको सहजीकरण रहने प्रधानमन्त्री शाहको प्रतिबद्धता
काठमाडौं । प्रधानमन्त्री वालेन्द्र शाहले स्वदेशमा उत्पादित जुत्ता–चप्पलको निर्यात प्रवर्द्धन तथा उद्योग विकासका लागि सरकारले आवश्यक सहजीकरण गर्ने प्रतिबद्धता जनाएका छन्।
प्रधानमन्त्री तथा मन्त्रिपरिषद्को कार्यालयमा शुक्रबार फुटवेयर म्यानुफ्याक्चरर्स एशोसिएसन अफ नेपाल (एफएमएएन) का पदाधिकारी तथा सदस्यसँग भएको छलफलमा प्रधानमन्त्री शाहले जुत्ता–चप्पलको आयात प्रतिस्थापन र रोजगारी सिर्जनाका लागि आवश्यक सहयोग गर्ने बताए।
उनले तीनै तहका सरकारको समन्वयमा जुत्ता–चप्पल उत्पादनसम्बन्धी सीपमूलक तालिम सञ्चालन गर्ने तथा नेपाली उत्पादनको प्रवर्द्धन र बजारीकरणमा निजी क्षेत्रलाई प्रोत्साहन गर्ने उल्लेख गरे।
प्रधानमन्त्री शाहले उद्योगको उत्पादन क्षमताअनुसार कच्चा पदार्थ आयातको सीमा, ट्रयाकिङ तथा अभिलेख व्यवस्थापनलाई प्रभावकारी बनाइने बताए।
छलफलका क्रममा एफएमएएनका पदाधिकारीहरूले विभिन्न सीमा नाकाबाट हुने अवैध चोरी पैठारी नियन्त्रण गर्न, करको दायराबाहिर रहेका स्वदेशी तथा विदेशी उत्पादनलाई कानुनी दायरामा ल्याउन र गुणस्तरहीन जुत्ता–चप्पलको आयात रोक्न सरकारको ध्यानाकर्षण गराएका थिए।
उनीहरूले आयातित जुत्ता–चप्पलमा अनिवार्य गुणस्तर परीक्षण लागू गर्न तथा उद्योगमैत्री नीति र बजार संरक्षणको व्यवस्था गर्न माग गरेका थिए।
छलफलमा एफएमएएनका अध्यक्ष सुरज बञ्जाडे, निवर्तमान अध्यक्ष रुद्र न्यौपाने, महासचिव निर्मल भट्टराई, सल्लाहकार कालिदास गौतम, सदस्य एवं प्रतिनिधिसभा सदस्य विदुषी राणालगायतको सहभागिता थियो।
