झलनाथ खनालको चेतावनी: कुर्सी मोहका लागि दक्षिणपन्थी शक्तिसँग साँठगाँठ नगर्न आग्रह
काठमाडौं, ३ साउन — नेकपाका वरिष्ठ नेता तथा पूर्वप्रधानमन्त्री झलनाथ खनालले सत्ता र पदको स्वार्थका लागि दक्षिणपन्थी शक्तिसँग ‘अपवित्र साँठगाँठ’ नगर्न पार्टी पङ्क्तिलाई चेतावनी दिएका छन्।
नवनिर्वाचित प्रधानमन्त्री बालेन्द्र शाह नेतृत्वको वर्तमान सरकारले जनअपेक्षाअनुसार काम गर्न नसकेको दाबी गर्दै खनालले यस्तो अवस्थामा सम्पूर्ण वामपन्थी शक्तिहरू एकताबद्ध हुनुपर्नेमा जोड दिएका छन्।
आइतबार जारी प्रेस विज्ञप्तिमा खनालले नयाँ सरकार गठनपछि मुलुकका समस्या समाधान हुने जनताको अपेक्षा निराशामा परिणत भएको दाबी गरेका छन्। उनले वर्तमान सरकारको कार्यकालमा राष्ट्रियता, जनजीविका, सूचनाको हक, छिमेकीसँगको सम्बन्ध तथा राज्यका अङ्गहरूबीचको समन्वयमा समस्या देखिन थालेको आरोप लगाएका छन्।
खनालले देशका श्रमजीवी जनता कठिन अवस्थामा पुगेको उल्लेख गर्दै विदेशी हस्तक्षेप र घरेलु समस्याविरुद्ध लोकतान्त्रिक, देशभक्त, वामपन्थी, समाजवादी तथा प्रगतिशील शक्तिहरू एकजुट हुनुपर्ने बताएका छन्।
उनले विगतमा नीतिहीनता, वर्ग दृष्टिकोणको अभाव र गुटगत स्वार्थका कारण दक्षिणपन्थी शक्तिसँग गरिएका सहकार्यले कम्युनिस्ट आन्दोलनलाई क्षति पुर्याएको दाबी गरेका छन्। पुनः त्यस्तै प्रकारका राजनीतिक सम्झौताले पार्टीको प्रतिष्ठामा थप असर पार्न सक्ने उनको चेतावनी छ।
विशेषगरी प्रदेश सरकार निर्माणका लागि भइरहेका राजनीतिक प्रयासप्रति लक्षित गर्दै खनालले नयाँ राजनीतिक समीकरण बनाउनु अघि केन्द्रीय संयोजन समितिको बैठक बोलाएर छलफल गर्न नेतृत्वसँग माग गरेका छन्।
उनले क्रान्तिकारी उद्देश्य र वर्ग दृष्टिकोणलाई आधार बनाएर मात्र प्रदेश सरकार निर्माणसम्बन्धी निर्णय गर्नुपर्ने र पार्टीलाई दक्षिणपन्थी सम्झौतावादतर्फ जानबाट जोगाउनुपर्ने बताएका छन्।
खनालले केही नेताहरूको व्यक्तिगत स्वार्थ र कुर्सी मोहका कारण हुने सम्झौतावादी प्रवृत्ति रोक्न आग्रह गर्दै अहिलेको समय पदका लागि साँठगाँठ गर्ने नभई सही कार्यदिशाका आधारमा पार्टी पुनर्गठन र रूपान्तरण गर्ने बेला भएको बताएका छन्।
उनले वामपन्थी शक्तिहरूले आपसी आग्रह, पूर्वाग्रह, दम्भ र घमण्ड त्यागेर एकताको पहल गर्नुपर्ने सुझावसमेत दिएका छन्।
