काठमाडौं — नेकपा एमालेका नेता रामबहादुर थापा ले प्रधानमन्त्रीको विवादास्पद अभिव्यक्ति संसद्को अभिलेखबाट नहटाएसम्म र प्रधानमन्त्रीले सदनमा आएर माफी नमागेसम्म संसद् अवरोध कायम रहने बताएका छन्।

संसद् भवन परिसरमा सञ्चारकर्मीसँग कुरा गर्दै थापाले प्रधानमन्त्रीले संसद्मा दिएको “नेपालले पनि भारतको भूभाग मिचेको छ” भन्ने अभिव्यक्ति गम्भीर विषय भएको भन्दै त्यसलाई रेकर्डबाट हटाउन र सभामुखले आवश्यक रुलिङ गर्नुपर्ने माग गरे।

उनले प्रधानमन्त्रीको अभिव्यक्ति नसच्याइएसम्म संसद्को कामकारबाही अघि बढ्न नसक्ने चेतावनी दिँदै देशको स्वाधीनतासँग जोडिएको विषय भएकाले अन्य एजेन्डामा जान नसकिने बताए।

“प्रधानमन्त्रीको अभिव्यक्ति रेकर्डबाट नहट्दासम्म संसद्को कारबाही अगाडि बढ्न सक्दैन। देश पहिला हो, देशको स्वाधीनता प्रमुख कुरा हो,” थापाले भने, “परराष्ट्रमन्त्रीले दिएको वक्तव्यमा हामी सहमत हुने अवस्थामा छैनौँ। स्वाधीनतासँग सम्बन्धित विषय संशोधन नगरी संकटको समाधान सम्भव छैन।”

थापाले रवि लामिछाने नेतृत्वको सरकारमाथि पनि प्रश्न उठाउँदै राष्ट्रिय स्वतन्त्र पार्टीले आफ्नै सदस्यहरूलाई नियन्त्रण गर्न नसकेको आरोप लगाए।

उनले राष्ट्रिय स्वतन्त्र पार्टीका पूर्वमहामन्त्री मुकुल ढकाल ले विभिन्न अन्तर्वार्तामा दिएको अभिव्यक्तिको सन्दर्भ उल्लेख गर्दै नेपाल कतै “पाकिस्तानी मोडल” तर्फ उन्मुख हुन लागेको संकेत देखिएको हो कि भन्ने आशंका समेत व्यक्त गरे।

एमालेले प्रधानमन्त्रीको अभिव्यक्तिप्रति असहमति जनाउँदै संसद्मा निरन्तर विरोध जारी राख्दै आएको छ।