सुदूरपश्चिमका एमाले सांसदसँग आज ओलीको छलफल, नेतृत्व र मन्त्री हेरफेर मुख्य एजेन्डा
नेकपा एमालेले आज सुदूरपश्चिम प्रदेशका आफ्ना सांसदहरूसँग महत्वपूर्ण छलफल गर्न लागेको छ। पार्टी अध्यक्ष केपी शर्मा ओलीले बिहान ११ बजे भक्तपुरको गुण्डुस्थित आफ्नै निवासमा प्रदेशका ११ सांसदलाई बोलाएर बैठक राख्न लागेका हुन्।
संसदीय दलको नेता परिवर्तनको विषय पछिल्लो समय उठेपछि अध्यक्ष ओलीले सामूहिक छलफलमार्फत निष्कर्षमा पुग्ने तयारी गरेका छन्। केही समयअघि तीन जना सांसदले दलको नेतृत्व परिवर्तनको माग गर्दै शीर्ष नेतृत्वसँग परामर्श गरेका थिए।
हाल उपनेता सन्तोष शर्मा थापा र प्रमुख सचेतक चक्र मल्ल नेतृत्वको प्रतिस्पर्धामा देखिएका छन्। बैठकमा नेतृत्व चयनसँगै सत्ता सहकार्य र मन्त्री हेरफेरका विषयमा पनि गहन छलफल हुने बताइएको छ।
विशेषगरी नेपाल कम्युनिस्ट पार्टी (नेकपा)सँग सहकार्यको सम्भावना र त्यसको सुरुवात सुदूरपश्चिमबाट गर्ने विषयमा समेत नेतृत्व तहमा बहस भइरहेको छ।
यसैबीच, प्रदेश सरकारमा रहेका मन्त्रीहरूको कार्यकाल दुई वर्ष नाघिसकेको भन्दै केही सांसदहरूले मन्त्री हेरफेरको माग गरेका छन्। हाल सुदूरपश्चिम प्रदेश सरकारमा एमालेका तीन मन्त्री र एक राज्यमन्त्री रहेका छन्।
