काठमाडौं, १३ जेठ — इरानसँगको जारी तनाव अन्त्य गर्न पाकिस्तानले खेलेको भूमिकाको चीनले प्रशंसा गरेपछि अमेरिकी पक्ष असन्तुष्ट देखिएको छ।

चीनका विदेशमन्त्री वाङ यी ले अमेरिका र इरानबीचको तनाव कम गर्न पाकिस्तानसहित अन्य देशहरूको मध्यस्थता प्रयासलाई चीनले समर्थन गर्ने बताएका छन्।

वाङ यीले लामो समयदेखिको विवाद एकै दिनमा समाधान नहुने भए पनि संवादका हरेक कदमले शान्तिको सम्भावना बढाउने बताएका छन्। उनले सबै पक्षलाई युद्धविराम र वार्ताको दिशामा अघि बढ्न आग्रह गर्दै पश्चिम एसियामा छिट्टै शान्ति स्थापना होस् भन्ने अपेक्षा व्यक्त गरेका छन्।

यसै क्रममा उनले हालै पाकिस्तानका फिल्ड मार्शल असीम मुनीर सँग भेट भएको जानकारी दिँदै इरान भ्रमण तथा तेहरान–वाशिङ्टन तनावबारे छलफल भएको बताएका छन्।

तर, यस घटनाक्रमप्रति अमेरिकी पक्षले प्रश्न उठाएको छ। अमेरिकी सांसद लिन्डसे ग्राहम ले पाकिस्तानको मध्यस्थता भूमिकामाथि आशंका व्यक्त गर्दै इजरायलप्रति पाकिस्तानको पुरानो नीति र इरानी सैन्य विमानलाई पाकिस्तानी एयरबेसमा स्थान दिएको भन्ने रिपोर्टहरू चिन्ताजनक भएको बताएका छन्।

ग्राहमले सामाजिक सञ्जालमा पोस्ट गर्दै पाकिस्तानले अमेरिकी राष्ट्रपति डोनाल्ड ट्रम्प लाई स्पष्ट जवाफ दिनुपर्ने र अब्राहम सम्झौतामा सहभागी हुने कि नहुने प्रष्ट पार्नुपर्ने बताएका छन्।

अब्राहम सम्झौता इजरायल र केही अरब देशबीच सम्बन्ध सामान्यीकरण गर्दै कूटनीतिक तथा व्यापारिक सम्बन्ध विस्तार गर्ने ऐतिहासिक सहमति हो।