चितवन — आगामी आर्थिक वर्षका लागि सरकारले सदनमार्फत सार्वजनिक गरेको नीति तथा कार्यक्रमले निजी क्षेत्रमा उत्साह बढाएको छ। उद्योगी–व्यवसायीहरूले नीति तथा कार्यक्रम सकारात्मक भए पनि यसको कार्यान्वयन कसरी हुन्छ भन्नेमा अझै ‘पर्ख र हेर’को अवस्था रहेको बताएका छन्।

उद्योग वाणिज्य सङ्घ चितवनका अध्यक्ष चिरञ्जीवी सुवेदीले नीति तथा कार्यक्रम उद्योगी–व्यवसायीका पक्षमा रहेको अनुभूति भएको बताए। उनले हरेक सरकारले राम्रो नीति ल्याउने भए पनि कार्यान्वयन कमजोर हुँदा निजी क्षेत्र प्रभावित हुने गरेको उल्लेख गर्दै यस पटक पनि कार्यान्वयन पक्ष नै मुख्य चासोको विषय रहेको बताए।

त्यस्तै, चितवन उद्योग सङ्घका अध्यक्ष मदन घिमिरेले नीति तथा कार्यक्रम सकारात्मक देखिएको बताउँदै बजेटले यी योजनालाई कसरी समेट्छ भन्नेमा धेरै कुरा निर्भर रहने बताए। उनले विद्युत् रिजर्भ राख्ने र एकद्वार प्रणाली जस्ता विषयले निजी क्षेत्रलाई उत्साहित बनाएको उल्लेख गरे।

चितवन चेम्बर अफ कमर्सका अध्यक्ष गोपाल भट्टराईले पनि नीति तथा कार्यक्रमले निजी क्षेत्रलाई प्राथमिकतामा राखेको देखिए पनि कार्यान्वयन प्रभावकारी नभए अपेक्षित उपलब्धि नआउने बताए।

पर्यटन क्षेत्रतर्फ, क्षेत्रीय होटल सङ्घ सौराहाका उपाध्यक्ष गुणराज थपलियाले नीति तथा कार्यक्रमले केही राहत र आशा दिएको बताए। उनले सरकारले घोषणा गरेको २०८५ सालको भ्रमण वर्षले पर्यटन व्यवसायीमा उत्साह जगाएको उल्लेख गरे।

यस्तै, नेपाल लेयर्स कुखुरापालक सङ्घका केन्द्रीय अध्यक्ष विनोद पोखरेलले लगानी बढाउन निजी क्षेत्रलाई प्रोत्साहित गर्ने खालको नीति आएको बताए। उनले बजेट चरणमा छुटेका विषयहरू समेटेर लगानीमैत्री वातावरण बनाउन सरकारलाई आग्रह गरे।

समग्रमा व्यवसायीहरूले नीति तथा कार्यक्रम सकारात्मक भए पनि यसको सफल कार्यान्वयन नै मुख्य चुनौती रहने बताएका छन्।