रास्वपा सांसद खरेलद्वारा राजधानी दैनिकमाथि कडा आलोचना, ‘डी ग्रेडको पत्रकारिता’ भन्दै टिप्पणी
काठमाडौं — राष्ट्रिय स्वतन्त्र पार्टी (रास्वपा) का सांसद तथा पूर्वमन्त्री जगदिश खरेलले राजधानी दैनिकमा प्रकाशित समाचारप्रति कडा आपत्ति जनाउँदै त्यसलाई ‘सी ग्रेड र डी ग्रेडको पत्रकारिता’ भन्दै आलोचना गरेका छन्।
सोमबार प्रतिनिधिसभाको बैठकमा बोल्दै सांसद खरेलले स्मार्ट टेलिकमको ३० अर्ब रुपैयाँ ठगी प्रकरणसँग आफ्नो नाम जोडेर प्रकाशित समाचारलाई भ्रामक, निरर्थक र आधारहीन भएको आरोप लगाए।
“यो स्मार्ट टेलिकमको ३० अर्ब ठगी प्रकरण भनेर र त्यसमा मलाई जोडेर सुटुक्क स्वीटजरल्यान्ड भागे भनेर लेखिएको समाचार यति निरर्थक, यति भ्रामक, यति घटिया र तल्लो स्तरको सी ग्रेडको पत्रकारिता समेत भन्न नसुहाउने स्तरमा प्रकाशन गरिएको छ,” उनले संसदमा भने।
उनले उक्त समाचारले आफ्नो व्यक्तिगत सम्मान, राजनीतिक जीवन तथा संसद र पार्टीको प्रतिष्ठामाथि समेत आघात पुर्याएको दाबी गरे।
खरेलले स्मार्ट टेलिकमसँग सम्बन्धित कुनै पनि बैठक वा फाइल प्रक्रियामा आफ्नो संलग्नता नभएको स्पष्ट पार्दै, यदि त्यसको प्रमाण देखिएमा राजनीति नै छाड्ने चुनौतीसमेत दिए।
“यदि कसैले प्रमाणित गर्न सक्छ भने म राजनीति नै छाड्छु,” उनले भने।
त्यसैगरी उनले समाचार प्रकाशन गर्ने सञ्चारगृह, सम्पादक र सम्बद्ध पक्षलाई संसदबाटै खुला चुनौती दिँदै भने, “प्रमाणित गर्न नसके पत्रकारिता नै बन्द गर्नसक्ने हिम्मत छ?”
राजधानी दैनिकले २२ वैशाखमा ‘स्मार्ट टेलिकममा ३० अर्ब ठगी प्रकरण’ शीर्षकमा समाचार प्रकाशित गरेको थियो। उक्त समाचारमा खरेलको नाम पनि अप्रत्यक्ष रूपमा जोडिएको दाबी गरिएको थियो।
नेपालमा छापा सञ्चारमाध्यमको वर्गीकरण ‘क, ख, ग, घ’ आधारमा हुने भए पनि सांसद खरेलले प्रयोग गरेको ‘सी र डी ग्रेड’ वर्गीकरण कानुनी रूपमा स्थापित नभएको बताइन्छ। साथै, नेपालको प्रचलित कानुनले पत्रकारितालाई औपचारिक रूपमा यस्तो ग्रेडमा वर्गीकरण गरेको व्यवस्था छैन।
