काठमाडौँ — अर्थमन्त्री डा. स्वर्णिम वाग्लेले सरकारी कर्मचारीको तलब संरचनामा महत्वपूर्ण परिवर्तन गर्दै कुल पारिश्रमिकमा करिब २१ प्रतिशतसम्म वृद्धि हुने घोषणा गरेका छन्।

शुक्रबार संघीय संसदको संयुक्त बैठकमा आगामी आर्थिक वर्षको बजेट प्रस्तुत गर्दै उनले कर्मचारीको आधारभूत तलबमा १० प्रतिशत वृद्धि गर्ने निर्णय गरिएको जानकारी दिए। विगत चार वर्षदेखि कर्मचारीको तलब पुनरवलोकन नभएकाले मर्यादित जीवनयापन सुनिश्चित गर्न यो कदम आवश्यक भएको उनले बताए।

सरकारले हाल दिँदै आएको ५ हजार रुपैयाँ महँगी भत्ता यथावत् राख्दै कार्यसम्पादनमा आधारित १० प्रतिशत मासिक प्रोत्साहन भत्ता पनि लागू गर्ने जनाएको छ।

अर्थमन्त्री वाग्लेले यी सबै समायोजनपछि कर्मचारीको खाइपाइ आएको पारिश्रमिकमा करिब २१ प्रतिशत खुद वृद्धि हुने र ग्रेडसहित न्यूनतम मासिक तलब करिब ४० हजार रुपैयाँदेखि १ लाख रुपैयाँभन्दा माथिसम्म पुग्ने उल्लेख गरे।

उनका अनुसार नयाँ तलब प्रणाली कार्यसम्पादनमा आधारित रहनेछ, जसले सरकारी सेवामा उत्पादकत्व र जिम्मेवारी बढाउने अपेक्षा गरिएको छ।