काठमाडौं — राजधानीको चक्रपथअन्तर्गत पर्ने नारायणगोपाल चोकदेखि चप्पल कारखानासम्मको करिब ७०० मिटर सडकखण्ड विस्तार कार्य सम्पन्न भएको छ। निर्माणपछि सडकमा लेन मार्किङ, जेब्रा क्रसिङ र अन्य रेखांकनसम्बन्धी काम पनि पूरा गरिएको छ।

कालोपत्रे गरिएको फराकिलो र व्यवस्थित सडकले उक्त खण्डलाई पहिलेको तुलनामा सहज र आकर्षक बनाएको छ। यो खण्ड काठमाडौं उपत्यकाको चक्रपथ सुधार तथा विस्तार योजनाअन्तर्गत निर्माण गरिएको हो।

डिभिजन सडक कार्यालय, मिनभवनले २०८१ फागुनमा एम–एस अम्बुजा–काली एसके जेभीसँग २०८२ असारभित्र काम सम्पन्न गर्ने गरी सम्झौता गरेको थियो। तर निर्माण कार्य करिब एक वर्ष ढिला गरी सम्पन्न भएको हो। उक्त खण्डका लागि चालु आर्थिक वर्षमा करिब २५ करोड रुपैयाँ बजेट विनियोजन गरिएको थियो।

यो सडकखण्ड चक्रपथको कलंकी–कोटेश्वर मापदण्डअनुसार विस्तार गरिएको हो। यसअघि चीन सरकारको सहयोगमा विस्तार गरिएको १०.३९ किलोमिटर खण्ड २०७५ माघमा नेपाललाई हस्तान्तरण गरिएको थियो भने दोस्रो चरणअन्तर्गत कलंकीदेखि बसुन्धारासम्म विस्तार गर्ने योजना अझै पूर्ण रूपमा अघि बढ्न सकेको छैन।

हाल चक्रपथ विस्तार आयोजनाअन्तर्गत विभिन्न खण्डमा क्रमिक रूपमा काम भइरहेको छ। सरकारले बढ्दो सवारी चाप व्यवस्थापन र उपत्यकाको यातायात प्रणाली सुधार गर्ने लक्ष्यसहित चक्रपथलाई आधुनिक र फराकिलो बनाउने योजना अघि बढाइरहेको छ।

नारायणगोपाल चोक–चप्पल कारखाना खण्ड सम्पन्न भएसँगै महाराजगन्ज क्षेत्रको ट्राफिक व्यवस्थापनमा केही सहजता आउने अपेक्षा गरिएको छ।