निजी क्षेत्रसँग सहकार्य गर्दै आर्थिक गतिविधि सुदृढ गर्ने मुख्यमन्त्री कार्कीको प्रतिबद्धता
विराटनगर — कोशी प्रदेशका मुख्यमन्त्री हिक्मतकुमार कार्कीले प्रदेशको आर्थिक गतिविधि सुदृढ बनाउन निजी क्षेत्रसँग सहकार्य गर्दै अघि बढ्ने बताएका छन्।
नेपाल उद्योग वाणिज्य महासङ्घ कोशी प्रदेशद्वारा विराटनगरमा आयोजित चौथो कार्यकारिणी समितिको पदस्थापन समारोहको उद्घाटन गर्दै उनले निजी क्षेत्रलाई विश्वासमा लिएर समृद्धिको अभियान अघि बढाइने बताए।
मुख्यमन्त्री कार्कीले राजनीतिक स्थायित्वसँगै देशले आर्थिक रूपमा सकारात्मक दिशा लिने विश्वास व्यक्त गर्दै विकासलाई सडक र पुलमा मात्र सीमित नराखी सूचना प्रविधि, पर्यटन र औद्योगिक क्षेत्रमा विस्तार गर्नुपर्ने आवश्यकता औँल्याए।
कार्यक्रममा विराटनगर महानगरपालिकाका प्रमुख नागेश कोइरालाले उद्योग–व्यवसायमैत्री वातावरण निर्माणमा महानगरले सहयोग गर्ने बताए। महासङ्घका अध्यक्ष राजेन्द्रबहादुर राउतले जलविद्युत्, पर्यटन, उद्योग र कृषि आधुनिकीकरणमार्फत समृद्ध नेपाल निर्माण गर्न सकिने धारणा राखे।
