बेइजिङ — अमेरिकी राष्ट्रपति डोनाल्ड ट्रम्प चीन भ्रमणमा अर्बपति अमेरिकी व्यवसायीहरूको ठूलो प्रतिनिधिमण्डलसँग पुगेका छन्। व्यापार, आर्टिफिसियल इन्टेलिजेन्स र भू–राजनीतिक विषयमा अमेरिका–चीनबीच वार्ता भइरहेका बेला यो भ्रमणलाई महत्वपूर्ण मानिएको छ।

टोलीमा टेस्लाका सीईओ एलन मस्क र एनभिडियाका सीईओ जेन्सन हुआङसहित विश्वका प्रमुख कम्पनीका शीर्ष कार्यकारीहरू सहभागी छन्। रिपोर्टअनुसार यी कार्यकारीहरूको कुल सम्पत्ति करिब १ ट्रिलियन अमेरिकी डलर नजिक रहेको छ।

ब्लुमबर्ग बिलियनेयर्स इन्डेक्सका अनुसार मस्कको सम्पत्ति करिब ६८८ अर्ब डलर र हुआङको करिब १८३ अर्ब डलर रहेको छ।

भ्रमणमा एप्पलका सीईओ टिम कुक, ब्ल्याकरकका ल्यारी फिङ्क, ब्ल्याकस्टोनका स्टिफेन स्क्वार्जम्यान, क्वालकमका क्रिस्टियानो आमोन, जीई एयरोस्पेसका ल्यारी कल्प, सिटीग्रुपकी जेन फ्रेजर, माइक्रोन टेक्नोलोजीका संजय मेहरोत्रा, बोइङका केली ओर्टबर्ग, कार्गिलका ब्रायन साइक्स र गोल्डम्यान साक्सका डेभिड सोलोमनलगायत सहभागी छन्।

एनभिडियाले चीनमा एआई चिप्स बजार विस्तारलाई प्रमुख अवसरका रूपमा हेरेको छ। यसैबीच, हुआङ अन्तिम समयमा भ्रमण टोलीमा समावेश भएका हुन्।

ट्रम्पले सामाजिक सञ्जालमा चिनियाँ राष्ट्रपति सी चिनफिङसँग अमेरिकी व्यवसायका लागि बजार खुला गर्न आग्रह गर्ने बताएका छन्। अमेरिका–चीन व्यापार तनावबीच यो भ्रमणलाई दुवै देशबीच सम्बन्ध सुधारको प्रयासका रूपमा हेरिएको छ।