सङ्खुवासभा, जेठ २५ — सङ्खुवासभामा अत्यधिक रक्तस्राव भएपछि एक सुत्केरी महिलाको नेपाली सेनाको हेलिकप्टरमार्फत हवाई उद्धार गरिएको छ।

जिल्ला प्रशासन कार्यालय सङ्खुवासभाका प्रमुख जिल्ला अधिकारी सिर्जना थपलियाका अनुसार खाँदबारी नगरपालिका–७ की ३० वर्षीया सविता मगरलाई जिल्ला अस्पतालमा उपचार सम्भव नभएपछि तत्काल उद्धार गरिएको हो।

आइतबार सुत्केरी व्यथाले च्यापेपछि जिल्ला अस्पताल भर्ना भएकी मगरको सोमबार बिहान ८ बजे शल्यक्रियामार्फत नवजात शिशु जन्माइएको थियो। तर त्यसपछि अत्यधिक रक्तस्राव भएपछि अवस्था गम्भीर बनेको चिकित्सकहरूले बताएका छन्।

जिल्ला अस्पताल सङ्खुवासभाका प्रमुख डा. सन्तोष देवका अनुसार बिरामीको अवस्था जटिल बन्दै गएपछि उनलाई थप उपचारका लागि काठमाडौंको थापाथलीस्थित प्रसूति गृह पठाइएको हो।

राष्ट्रपति महिला उत्थान कार्यक्रमअन्तर्गत महिला, बालबालिका तथा ज्येष्ठ नागरिक मन्त्रालयको समन्वयमा नेपाली सेनाको हेलिकप्टरमार्फत उद्धार गरिएको जनाइएको छ।