दाङ — लामो समयदेखि बस्ती स्थानान्तरणको माग राख्दै आएका दाङका स्थानीय बासिन्दाले यसपटकको प्रतिनिधिसभा सदस्य निर्वाचन बहिष्कार गरेका छन्। बस्ती स्थानान्तरणको माग सम्बोधन नभएको भन्दै उनीहरूले दुई मतदान केन्द्रमा मतदान नगरेका हुन्।

दाङ जिल्लाकी सहायक प्रमुख जिल्ला अधिकारी साबित्रा पुनका अनुसार दिउँसो २:५० बजेसम्म मध्यवर्ती बबई गाउँपालिका–७ स्थित देउती माध्यमिक विद्यालय मलई मतदान केन्द्र र बबई गाउँपालिका–१ स्थित जनता माध्यमिक विद्यालय जिला मतदान केन्द्रमा कुनै पनि मतदाता मतदान गर्न आएका छैनन्।

उनका अनुसार स्थानीयले मतदान केन्द्रमा खटिएका कर्मचारीलाई कुनै अवरोध नगरे पनि उनीहरू मतदान प्रक्रियामा सहभागी भएका छैनन्।

उक्त क्षेत्रका बासिन्दा लामो समयदेखि बाँके राष्ट्रिय निकुञ्ज आसपासबाट आउने जंगली जनावरका कारण पीडित हुँदै आएका छन्। जंगली जनावरको जोखिम बढ्दै गएपछि उनीहरूले सुरक्षित स्थानमा बस्ती स्थानान्तरणको माग गर्दै आएका थिए।

तर, सरकार र राजनीतिक दलहरूले माग सम्बोधन नगरेको भन्दै स्थानीयले असन्तुष्टि जनाउँदै यसपटकको निर्वाचन बहिष्कार गर्ने निर्णय गरेका हुन्।