जनकपुर । सुशीला कार्कीले मधेस प्रदेश तथा धनुषा जिल्लामा शान्तिपूर्ण रूपमा निर्वाचन सम्पन्न गराउन भूमिका खेलेका प्रदेश सरकार र सुरक्षा निकायप्रति आभार व्यक्त गरेकी छन्।

जनकपुर विमानस्थलमा शुक्रबार आयोजित सुरक्षा बैठकलाई सम्बोधन गर्दै उनले मधेस प्रदेशका गृह, सञ्चार तथा कानुनमन्त्री फकिरा महतो, उच्च सुरक्षा अधिकारीहरू तथा धनुषाका सुरक्षा प्रमुखलाई निर्वाचन सफलतापूर्वक सम्पन्न गराएकामा धन्यवाद दिइन्।

प्रधानमन्त्री कार्कीले विभिन्न आशंका र चुनौतीबीच पनि ऐतिहासिक रूपमा शान्तिपूर्ण निर्वाचन सम्पन्न गराउनु प्रदेश सरकार र सुरक्षा निकायको सराहनीय उपलब्धि भएको उल्लेख गरिन्।

बैठकमा मधेस प्रदेश सरकारका निमित्त मुख्य सचिव कमलप्रसाद भट्टराई, मधेस प्रदेश प्रहरी प्रमुख प्रहरी नायब महानिरीक्षक गोविन्द थपलिया, धनुषाका प्रमुख जिल्ला अधिकारी प्रेमप्रसाद दाहाललगायत विभिन्न सुरक्षा निकायका प्रमुखहरूको उपस्थिति रहेको थियो।