प्रहरीले मानव बेचबिखन तथा ओसारपसार तथा जबर्जस्ती वेश्यावृत्तिमा संलग्न रहेको आरोपमा होटल सञ्चालकसहित आठ जनालाई पक्राउ गरेको छ। जिल्लाका विभिन्न स्थानमा भएका तीन छुट्टाछुट्टै घटनामा संलग्न उनीहरूलाई नियन्त्रणमा लिएर अनुसन्धान सुरु गरिएको प्रहरीले जनाएको छ।

जिल्ला प्रहरी कार्यालयका सूचना अधिकारी रमेशबहादुर पालका अनुसार पहिलो घटना लहान नगरपालिका–८ मा भएको हो। सो क्षेत्रमा बसोबास गर्ने दिलीप साह र उनकी श्रीमती सुनिताले तीन महिलालाई आर्थिक प्रलोभनमा पारी वेश्यावृत्तिमा संलग्न गराएको आरोपमा पक्राउ गरिएको छ। उनीहरूलाई जिल्ला अदालतबाट पाँच दिनको म्याद थप गरी अनुसन्धान अघि बढाइएको छ।

यस्तै, दोस्रो घटना लहान–३ स्थित अस्पताल चोकमा रहेको ‘अनलाइ होटल एन्ड लज’मा भएको हो। होटल सञ्चालिका ४० वर्षीया अर्चनाकुमारी चौधरीले चार महिलालाई सप्तरीको सुरुङ्गा–९ टिकुलियाका २१ वर्षीय अशोककुमार चौधरी, २० वर्षीय नितिककुमार चौधरी र १९ वर्षीय आकाश चौधरीसँग मिलेर वेश्यावृत्तिमा संलग्न गराएको आरोपमा पक्राउ गरिएको प्रहरीले जनाएको छ। यस घटनामा संलग्न चारै जनालाई सात दिनको म्याद थप गरी अनुसन्धान जारी छ।

त्यसैगरी, तेस्रो घटना धनगढीमाई नगरपालिका–११ स्थित ‘खुश्बु होटल एन्ड लज’मा भएको हो। होटल सञ्चालक ३४ वर्षीय गुज्जेश्वर साहले सप्तरीको बलानबिहुल–६ का ३८ वर्षीय शिवकुमार यादवसँग मिलेर दुई महिलालाई जबर्जस्ती वेश्यावृत्तिमा लगाएको आरोप छ। उनीहरूलाई पनि सात दिनको म्याद थप गरी मानव बेचबिखन तथा ओसारपसार मुद्दामा अनुसन्धान भइरहेको छ।

प्रहरीले पीडित महिलाहरूको पहिचान गोप्य राख्दै सांकेतिक नाम प्रयोग गरी कानुनी प्रक्रिया अघि बढाएको जनाएको छ। पछिल्लो समय होटल तथा निजी घरहरू प्रयोग गरी यस्ता अवैध गतिविधि सञ्चालन भइरहेको सूचनाका आधारमा जिल्लाभर निगरानी कडा पारिएको प्रहरीको भनाइ छ।