रवि नेतृत्वको पक्षमा हर्क साम्पाङको समर्थन, दुईतिहाइमा सघाउने संकेत
श्रमसंस्कृति पार्टीका अध्यक्ष हर्क साम्पाङले देशका लागि राम्रो काम हुने अवस्थामा राष्ट्रिय स्वतन्त्र पार्टीलाई दुईतिहाइ पुर्याउन सघाउने बताएका छन् ।
प्रतिनिधिसभा सदस्यको शपथका लागि मंगलबार धरानबाट काठमाडौं आइपुगेका उनले सञ्चारकर्मीसँग यस्तो बताएका हुन् ।
‘रास्वपालाई के को लागि चाहिने हो दुईतिहाइ, राम्रो काममा हो भने हामी पुर्याइदिन्छौँ’, उनले भने, ‘अहिले हामीलाई सरकारमा जाने म्यान्डेट छैन । हामीलाई सरकार चलाउने म्यान्डेट जनताले नदिएकाले प्रतिपक्षमै बस्ने हो । तर यदि रास्वपा राम्रो काम गर्छ भने हामी दुईतिहाइ पुर्याउन सघाउँछौँ।’
रास्वपाको अहिले १८२ जना सांसद छन् । दुईतिहाइका लागि उसलाई दुईजना सांसद चाहिन्छ । म्याग्दीमा महावीर पुनले स्वतन्त्रबाट जितेका छन् । उनलाई रास्वपालले सघाएको छ। महावीरले साथ दिए अझै एकजना सांसद चाहिन्छ । तर प्रत्यक्षमा ३ र समानुपातिकमा ४ सिट जितेको श्रमसंस्कृतिले साथ दिए सजिलै दुईतिहाइ पुग्छ ।
हर्कले अहिले पनि बालेन्द्र साह होइन, रवि लामिछाने नै प्रधामन्त्रि हुनुपर्ने बताए । ‘रवि बोल्ने मान्छे हुन्। उनी प्रधानमन्त्री हुनुपर्छ । प्रतिपक्षीले प्रश्न गर्दा उत्तर दिने प्रधानमन्त्री चाहिन्छ’, उनले भने, ‘हामीलाई जनताका प्रश्नको उत्तर दिने नेता चाहिएको छ।’
उनले आफूलाई प्रधानमन्त्री हुने जनमत नमिलेको बताए । ‘मैले मात्रै होइन, प्रधानमन्त्री बन्छु भनेर सबै नेताले भनेको हो । जनताले नचुनेकाले प्रधानमन्त्री हुन सकिएन’, उनले भने, ‘अब प्रतिपक्षमा बसेर खबरदारी गर्ने हो । हामीलाई जनताले प्रश्न गर्ने म्यान्डेट दिएका छन् ।’
