काठमाडौं । राष्ट्रिय सभाले सरकारले फिर्ता लिने निर्णय गरेको सामाजिक सञ्जाल विधेयक सर्वसम्मतिले पारित गरेको छ।

आज बसेको राष्ट्रिय सभाको बैठकमा राष्ट्रिय सभामा विचाराधीन रहेको सामाजिक सञ्जाल विधेयक, २०८१ फिर्ता भएको हो। सभाका अध्यक्ष नारायण दाहालले विधेयक फिर्ता गर्ने प्रस्ताव निर्णयार्थ प्रस्तुत गर्दै सभाबाट सर्वसम्मतिले पारित भएको घोषणा गरे।

यसअघि विधायन व्यवस्थापन समितिका सभापति तुलसाकुमारी दाहालले ‘सामाजिक सञ्जाल विधेयक, २०८१ सम्बन्धी विधायन व्यवस्थापन समितिको प्रतिवेदन’* सभामा पेस गरेकी थिइन्।

राष्ट्रिय सभाको २०८२ भदौ १३ गते बसेको बैठकले उक्त विधेयक राष्ट्रिय सभाबाट उत्पत्ति गरी दफावार छलफलका लागि विधायन व्यवस्थापन समितिमा पठाएको थियो। समितिमा ३५ जना सांसदले १५५ वटा संशोधन प्रस्ताव दर्ता गराएका थिए।

समितिका सभापति दाहालले विधेयकमाथि सूचना तथा सञ्चार प्रविधिमन्त्री, मन्त्रालयका सचिव तथा सरोकारवालासँग विभिन्न चरणमा अनौपचारिक छलफल गरिएको जानकारी दिइन्।

सञ्चार तथा सूचना प्रविधि मन्त्रालयले गत माघ २० गते सामाजिक सञ्जाल विधेयक फिर्ता माग्ने निर्णय गरेको थियो। सो निर्णयअनुसार माघ २१ गतेको पत्रमार्फत सरकारका तर्फबाट राष्ट्रिय सभामा विधेयक फिर्ता गर्न निर्देशन दिइएको थियो।