पाकिस्तानको दक्षिण–पश्चिमी प्रान्त बलुचिस्तानमा सुरक्षा बलले सञ्चालन गरेको आतंकवादविरोधी अभियानमा कम्तीमा २१६ जना आतंककारी मारिएका छन्। पाकिस्तानी सेनाको सञ्चार शाखा इन्टर–सर्भिसेज पब्लिक रिलेसन्स (आईएसपीआर) का अनुसार उक्त अभियानमा सुरक्षा बल तथा कानून कार्यान्वयन निकायका २२ जना कर्मचारी र ३६ जना सर्वसाधारणले पनि ज्यान गुमाएका छन्।

आईएसपीआरले जनाएको अनुसार स्थानीय बासिन्दाका लागि गम्भीर खतरा उत्पन्न गरिरहेका आतंककारीहरूको उपस्थितिबारे विश्वसनीय गुप्तचरी सूचना प्राप्त भएपछि जनवरी २९ बाट अभियान सुरु गरिएको थियो। अभियानका क्रममा प्रतिबन्धित बलुचिस्तान लिबरेसन आर्मीले गरेका श्रृंखलावद्ध आक्रमणहरू विफल पारिएको सेनाको दाबी छ।

त्यसपछि विभिन्न क्षेत्रमा गुप्तचरीमा आधारित अपरेसन विस्तार गर्दै निरन्तर कोम्बिङ र सेनिटाइजेसन अभियान सञ्चालन गरिएको थियो, जसको उद्देश्य आतंककारीका ‘स्लिपर सेल’हरू ध्वस्त पार्नु रहेको जनाइएको छ। भियानका क्रममा ठूलो परिमाणमा विदेशी हतियार, गोलाबारुद, विस्फोटक पदार्थ र अन्य सैन्य सामग्री पनि बरामद गरिएको आईएसपीआरले जानकारी दिएको छ।