दाङ । क्रान्तिकारी कम्युनिस्ट पार्टी निकट विद्यार्थी संगठन अखिल नेपाल स्वतन्त्र विद्यार्थी युनियन (क्रान्तिकारी) ले दाङ जिल्लामा आफ्नो साङ्गठनिक उपस्थितिलाई थप मजबुत बनाएको छ। तुलसीपुर उपमहानगरपालिका-६ मा आयोजित एक विशेष कार्यक्रमका बीच संगठनको २१ सदस्यीय जिल्ला कमिटी गठन गरिएको हो।

सुमन रावतको नेतृत्वमा नयाँ कार्यसमिति
विद्यार्थी भेलाले सुमन रावत को अध्यक्षतामा २१ सदस्यीय अखिल नेपाल स्वतन्त्र विद्यार्थी युनियन (क्रान्तिकारी) जिल्ला कमिटी सर्वसम्मत रूपमा चयन गरेको छ। नवगठित समितिलाई जिल्लाभरका शैक्षिक संस्थाहरूमा संगठन विस्तार र विद्यार्थी हक-हितका लागि काम गर्ने जिम्मेवारी दिइएको छ।

"विद्यार्थीको हितबिना समाज रूपान्तरण असम्भव" : हुकुम खड्का
कार्यक्रमका प्रमुख अतिथि एवं पार्टीका केन्द्रीय सदस्य तथा दाङ जिल्ला सेक्रेटरी हुकुम खड्काले विद्यार्थीहरू क्रान्तिको मुख्य आधारशिला भएको बताउनुभयो। शिक्षा क्षेत्रमा बढ्दो व्यापारीकरण र विभेदप्रति चिन्ता व्यक्त गर्दै उहाँले भन्नुभयो, "विद्यार्थीको हक-हित सुनिश्चित नगरी समाज रूपान्तरण सम्भव छैन। अन्यायका विरुद्ध विद्यार्थी आन्दोलन अझ सशक्त हुनुपर्छ।"
शैक्षिक असमानता विरुद्ध संगठित संघर्षको उद्घोष

कार्यक्रम संयोजक तथा विद्यार्थी इन्चार्ज हेमन्त डाँगीले संगठनको मुख्य उद्देश्य क्रान्तिकारी विचारसहित विद्यार्थीका मौलिक अधिकारको रक्षा गर्नु रहेको स्पष्ट पार्नुभयो। उहाँले महँगो शिक्षा र बेरोजगारी जस्ता समस्या समाधानका लागि अब दाङका गाउँ-गाउँ र क्याम्पस-क्याम्पससम्म संगठन विस्तार गरिने प्रतिबद्धता व्यक्त गर्नुभयो।

संगठनको 'ऐतिहासिक छलाङ'
४ नम्बर क्षेत्रीय ब्युरो विद्यार्थी फ्याक्सन इन्चार्ज हेमन्त ओलीको अध्यक्षतामा सम्पन्न उक्त कार्यक्रममा उहाँले संगठनले पछिल्लो समय वैचारिक र संगठनात्मक रूपमा 'ऐतिहासिक छलाङ' मारेको दाबी गर्नुभयो। आफ्नो विद्यार्थी राजनीतिको अनुभव सुनाउँदै उहाँले जिम्मेवारी सम्हालेपछि संगठन निर्माणमा उल्लेखनीय प्रगति भएको बताउनुभयो।

एकता र चेतनामा जोड
कार्यक्रममा सहभागी विद्यार्थीहरूले क्रान्तिको लक्ष्य पूरा गर्न विद्यार्थीहरूबीचको एकता, उच्च चेतना र निरन्तर संघर्ष अपरिहार्य रहेको निष्कर्ष निकालेका थिए। कार्यक्रमको सञ्चालन विद्यार्थी इन्चार्ज हेमन्त डाँगीले गर्नुभएको थियो।