काठमाडौँ – राष्ट्रिय स्वतन्त्र पार्टी (रास्वपा) का बागमती प्रदेश उपसभापति दिनेश हुमागाई ले पार्टीमा आन्तरिक असन्तुष्टि जनाउँदै राजीनामा दिएका छन्।

हुमागाईले २०७९ को निर्वाचनमा काभ्रेबाट प्रत्यक्ष उम्मेदवारका रूपमा प्रतिस्पर्धा गरेका थिए र आज पार्टी महामन्त्रीलाई औपचारिक रूपमा आफ्नो राजीनामा बुझाएका छन्।

उनको राजीनामामा सात प्रमुख कारण उल्लेख छन्: उम्मेदवार छनोटमा चलखेल, केन्द्रीय संरचना विस्तारमा अपारदर्शिता, सदस्यता तथा आर्थिक व्यवस्थापनमा गम्भीर प्रश्न, विधान उल्लङ्घन र आन्तरिक लोकतन्त्रको समाप्ति, प्रदेशको अन्तिम तहको आवाजको बेवास्ता, नेतृत्वमाथि नैतिक प्रश्न, तथा पार्टी संरचनागत विकृति र निजी स्वार्थ।

राजीनामाको अन्त्यमा हुमागाईले लेखेका छन्, “आफैंभित्रको विकृति सच्याउन नसक्ने, आन्तरिक लोकतन्त्रको सम्मान नगर्ने, पारदर्शिता कायम नगर्ने र नैतिक बल गुमाइसकेको संगठनले राष्ट्र निर्माणको दाबी गर्नु केवल नारा मात्र हुनसक्छ।”

यस कदमसँगै बागमती प्रदेशको राजनीतिमा रास्वपाभित्र थप चर्चा हुने देखिन्छ।