सल्यान । आगामी फागुन २१ गते हुने प्रतिनिधिसभा सदस्यको निर्वाचनका लागि सल्यान जिल्लामा राजनीतिक सरगर्मी ह्वात्तै बढेको छ। परम्परागत शक्ति र नयाँ उदयमान दलहरूबीचको मिश्रित प्रतिस्पर्धाले यसपटकको निर्वाचनलाई निकै रोचक बनाउने संकेत देखिएको छ। निर्वाचनका लागि प्रत्यक्षतर्फ १४ राजनीतिक दल र २ स्वतन्त्र गरी कुल १६ जनाले उम्मेदवारी दर्ता गराएका छन्।

सल्यान सदरमुकाम खलङ्गास्थित मुख्य निर्वाचन अधिकृतको कार्यालयमा मंगलबार बिहान १० बजेदेखि बेलुकी ५ बजेसम्म उत्साहजनक रूपमा मनोनयन दर्ता प्रक्रिया सम्पन्न भएको हो। जिल्ला निर्वाचन कार्यालय सल्यानका अनुसार उम्मेदवारी दर्ता प्रक्रिया शान्तिपूर्ण र व्यवस्थित रहेको थियो।

पुराना दलको विरासत जोगाउने दाउ जिल्लामा लामो समयदेखि पकड जमाउँदै आएका ठूला दलहरूले अनुभवी र स्थापित अनुहारलाई मैदानमा उतारेका छन्। नेपाली कांग्रेसका तर्फबाट केश बहादुर बिष्ट, नेकपा (एमाले) बाट गुलाब जंग शाह, नेपाली कम्युनिष्ट पार्टीबाट रमेश मल्ल, राष्ट्रिय स्वतन्त्र पार्टीबाट ललित कुमार चन्द, नेकपा (माओवादी) बाट चन्द्र बहादुर खड्काले उम्मेदवारी दर्ता गराउनुभएको छ। 

त्यस्तै, राष्ट्रिय प्रजातन्त्र पार्टी (राप्रपा) बाट अनिशा नेपाली, आम जनता पार्टीबाट मानसिगें कामी, र राष्ट्रिय जनमोर्चाबाट कमला डाँगीले उम्मेदवारी दिएका छन्। यस्तै, नेपाल मजदुर किसान पार्टीका लाल बहादुर थापा क्षेत्री, संयुक्त नागरिक पार्टीका कालिदास वि.क., नेशनल रिपब्लिक नेपालका डिल्ली बहादुर घर्ती, प्रगतिशील लोकतान्त्रिक पार्टीका सन्तोष कुमार राई, मंगोल नेशनल अर्गनाइजेशनका बाला सिंह घर्ती र श्रम संस्कृति पार्टीका धन बहादुर बुढामगरले पनि प्रतिस्पर्धामा उत्रिएका छन ।

दलगत उम्मेदवारबाहेक दुई जना स्वतन्त्र उम्मेदवारले पनि मनोनयन दर्ता गराएर प्रतिस्पर्धालाई थप पेचिलो बनाएका छन्। स्वतन्त्र उम्मेदवारका रूपमा ध्रुवराज वली र जुद्ध बहादुर सिंह चुनावी मैदानमा होमिनुभएको छ। उनीहरूको उम्मेदवारीले परम्परागत भोट बैंकमा पर्न सक्ने प्रभावलाई लिएर जिल्लामा चर्चा सुरु भएको छ।
अबको प्रक्रिया निर्वाचन कार्यालयका अनुसार अब उम्मेदवारको नामावलीमाथि दाबी-विरोध गर्ने, जाँचबुझ गर्ने, अन्तिम नामावली प्रकाशन गर्ने र चुनाव चिन्ह वितरण गर्ने कार्यतालिका रहेको छ। पुराना दलको सांगठनिक शक्ति र नयाँ दलको परिवर्तनकारी एजेन्डाबीच हुने यो प्रतिस्पर्धालाई सल्यानका मतदाताले कसरी लिन्छन् भन्ने कुराले फागुन २१ को नतिजा निर्धारण गर्नेछ।